Búgingi je komısıasynyń otyrysynda Senat depýtaty Qýanysh Aıtahanov shekarada eldi mekender quryp, sol jerdi ıgerý kerektigin aıtty, - dep habarlaıdy Qamshy.kz.

Shekaramyzdyń myńdaǵan shaqyrym jerinde eshkim turmaıtyndyǵyn, ıen qalǵandyǵyn alǵa tartqan depýtat «sol shekarany baryp ıgerýimiz kerek. Sol shekarada eldi mekender qurýymyz qajet. Sol jerdegi jerdi ıgerýge tıispiz. Iaǵnı, bul másele búgingi otyrystyń kún tártibine durys qoıylmaǵan», - dedi.

-Kún tártibinde bylaı jazylypty: «Qazaqstan Respýblıkasy shekarasy mańynan beriletin aýyl sharýashylyǵy jerlerin berýge shekteý týraly». Kimge berýge shekteý týraly? Sheteldikterge me, joq qazaqstandyqtarǵa ma? Myna jerde qazaqstandyqtarǵa dep jazylypty. Al eger qazaqstandyqtarǵa bolsa, onda oǵan shekteý qoıýǵa múldem bolmaıdy. Kerisinshe, qazaqstandyqtar shekaralyq jerlerdi baryp ıgersin. Kóbirek ıgersin. Nege biz qazaqstandyqtarǵa shekteý qoıamyz? Eger Qazaqstan azamattary shekara mańynan jer alyp, sharýashylyǵyn jaqsylap júrgizse, ol shekara nyǵaıa beredi. Sol sebepten bul shekteýdi qazaqstandyqtar úshin múldem alyp tastaýymyz qajet», - dedi Qýanysh Aıtahanov