Rýhanı ortada «ámbebap ádebıetshi» atanǵan aqyn, aýdarmashy, synshy, mádenıettanýshy, fılosofıa ǵylymdarynyń kandıdaty Áýezhan Qodar dúnıeden ozdy, - dep habarlaıdy Qamshy.kz.

Áýezhan Ábdiramanuly Qodar 1958 jyly 12 maýsymda Qyzylorda oblysy, Qarmaqshy aýdany, Qarmaqshy sovhozynda dúnıege kelgen. 1982 jyly Qazaq memlekettik ýnıversıtetiniń zań fakúltetin bitirgen. 1982–1985 jyldary Qyzylorda oblysy Qarmaqshy aýatkomynyń jasóspirimder jónindegi komısıanyń hatshysy, zańger. 1985 jyldan bastap týyndylary respýblıkalyq jáne odaqtyq baspasózde jarıalana bastady. 1986 jyly respýblıkalyq shyǵarmashylyq jastardyń «Jiger» festıvaliniń laýreaty. 

1989–1994 jyldary Qazaqstan Jazýshylar odaǵy janyndaǵy kórkem aýdarma jáne ádebı baılanystar jónindegi redaksıalyq Bas alqasynda orys bóliminiń meńgerýshisi qyzmetin atqarady. 1994 jyldan beri Qazaqstan halyqtarynyń mádenıetin qorǵaý jónindegi «Altyn ǵasyr» qoǵamdyq birlestiginiń prezıdenti. 1995–1997 jyldary M.O.Áýezov atyndaǵy Qazaq akademıalyq drama teatrynyń kórkemdik keńesiniń múshesi. 1997–1998 jyldary Nemis teatr akademıasynda fılosofıa tarıhynan sabaq beredi. 1999 jyldan beri «Tamyr» jýrnalynyń bas redaktory. 1999–2001 jyldary Soros–Qazaqstan halyqaralyq qorynyń Basqarma múshesi.

Eńbekterin qazaq jáne orys tilinde jazady. «Týǵan kún», «Aqedildiń anty» pesalarynyń (1986), «Qanatty órnek» (1990), «Abaı (Ibrahım) Qunanbaev» jınaǵynyń (1996), «Eske almaý sheńberi» (1998), «Qazaq ádebıetiniń tarıhyna sholý» (1999) kitabynyń, «Qanaǵat qaǵanaty» jınaǵynyń (1994) avtory. Orys tiline Abaı, Maǵjan, J.Jaqypbaevtyń shyǵarmalaryn aýdarǵan. Qazaq tiline E.Zamátınniń «Atılla» dramasyn, M.Haıdegger men H.Gasettiń fılosofıalyq jumystaryn, K.Shvıtterstiń óleńderin aýdarǵan. «Batys fılosofıasy antologıasynyń» avtory jáne uıymdastyrýshysy. «Astana» medalimen marapattalǵan (1998). «Parasat» ordeniniń ıegeri (2006).