Ádette «Egemen Qazaqstan» gazetin «Bas gazet», «El gazeti» dep jatamyz. Ǵasyrǵa jýyq tarıhy bar, qazaq jýrnalısıkasynyń sandaǵan býyny úshin shyǵarmashylyq sheberliktiń naǵyz ustahanasy bolǵan basylym jańa zaman aǵymynda birshama kibirtiktep qalǵanyn oqyrman qaýym ǵana sezip otyrǵan joq, qalam ustaǵan jigitterdiń ózi de moıyndaıdy. Bas basylymnyń naryqtyq júıege tez beıimdelip, básekege qabylettilik baǵalanatyn jańa qoǵam úderisine jyldam erýine shyǵarmashylyq áleýeti, jýrnalıserdiń qarym-qabyleti emes, eń aldymen keshegi keńestik sananyń sarqynshaǵy, memlekettik búrokratızm kedergi bolǵanyn barlyǵymyz kórip, bilip otyrmyz.
Elbasy Jarlyǵymen jaqynda ǵana qurylǵan Aqparat jáne komýnıkasıa mınıstrliginiń basshysy Dáýren Abaev aqparat salasyndaǵy jumysyn «Egemenniń» prezıdentin aýystyrýdan bastaǵanyn árkim ár qıly qabyldaǵan bolar. Jas basshynyń batyl qadamdaryn durys qabyldamaýshylyq oryn alyp jatýy da múmkin. Sáýir aıynda ǵana basshysy aýysqan basylymda kadrlyq aýys-túıis jasaýdyń negizgi maqsaty da osy gazetti zaman kóshinen qaldyrmaı, shyn mánindegi «Bas gazetke» aınaldyrý dep bilemiz. Gazet basshylyǵyna belgili ǵalym, qarymdy pýblısıs Darhan Qydyráliniń taǵaıyndalýyn qoǵam da jaqsy qabyldady. Áleýmettik jelide, baspasózde bul oqıǵa erekshe atap ótilýde. Tipti, memleket saıasatyn ashyq synap júrgen keı saıasatkerler de bul taǵaıyndaýdan úmit kútetinderin jazyp jatyr. Esimi el ishinde ǵana emes, Halyqaralyq sheńberde tanylǵan, Túrki tildes elderdiń mádenı, tarıhı baılanysyn nyǵaıtý, jalpytúrkilik qundylyqtardy nasıhattaý baǵytynda qyrýar is tyndyrǵan tarıhshynyń aldynda «Egemendi» eldiń súıikti basylymyna aınaldyrý mindeti tur. Darhan Qydyráli myrza ol mindetti de oıdaǵydaı atqaryp shyǵaryna kúmánimiz joq. Kesheli beri gazet ujymynda shyǵarmashylyq, tehnıkalyq qyzmetkerler jıyndary ótkizilip, gazettiń bedelin kóterý, zamanǵa saı ádis, tásilderdi meńgerý, áleýmettik jelilerdiń múmkindigin paıdalaný syndy naqty máselelerdiń sóz etilgenin estip jatyrmyz.
Taǵy bir jaǵymdy jańalyq – elimizdiń negizgi aqparat agenttikteriniń biri «QazAqparat» agenttigi basshysynyń aýysýy. Otandyq ınternet jýrnalısıkanyń kóshbasshysyna laıyq qyzmet atqaryp otyrǵan ujymnyń eńbegi tıisti baǵasyn alyp júr deı almaımyz. Tipti, sońǵy jyldarda aqparat quralynyń qyzmetkerleriniń jalaqydan da qıyndyq kórip júrgenin estip júrmiz. Mınıstr agenttik basshysyn aýystyrǵanda osy máselelerdi eskergen bolýy kerek. «QazAqparat» basshylyǵyna kelgen Ásel Tólegenovanyń esimi jýrnalısıkadaǵy jańa tolqyn ókilderine de, aǵa býynǵa da jaqsy tanys. «Tengrınús» syndy aqparat alybynda shyńdalǵan Áseldiń QazAqparatty da qazaqstandyq aqparat quraldarynyń kóshbasshysyna aınaldyrýǵa múmkindigi joq emes.
Qazaq basylymdaryn jibermeı oqıtyn, árkez tilekshi bop júretin qarapaıym oqyrman retinde eldiń negizgi aqparat quraldarynyń basshylyǵyna taǵaıyndalǵan Darhan Qydyráli men Ásel Tólegenovany jańa laýazymdarymen quttyqtaı otyryp, qyzmetterine tabys tileımin! Qos jetekshi atalǵan BAQ-tardyń basyna baq bop qonǵan basshy bolsyn!
Iahıa Júsip
