DAISH (Qazaqstanda tyıym salynǵan lańkestik uıym) sodyrlary eki pıloty bar reseılik Mı-25 tikushaǵyn atyp túsirdi. Ekeýi de qaza tapty. Oqıǵa 8 shildede Palmıra mańyndaǵy Homs eldi mekeninde boldy, - dep habarlaıdy Qamshy.kz Tengrinews.kz -ke silteme jasap.

Áskerı ushqysh-ınstrýktor - polkovnık Ráfagat Habıbýlın men ushqysh-operator, leıtenant Evgenıı Dolgın sırıalyq qolbasshylyqtan DAISH sodyrlaryn atqylaýǵa suranys alǵan. Bul ýaqytta Palmıranyń shyǵysynda sodyrlardyń jasaǵy sırıalyq áskerılerge shabýyl jasap jatqan.

"Ekıpaj komandıri Ráfagat Habıbýlın lańkesterge shabýyl jasaý týraly sheshim qabyldady. Reseılik ekıpajdyń saýatty is-áreketteriniń arqasynda lańkesterdiń shabýyly toqtady. Atys jıyndyǵy taýsylǵannan keıin keri qaraı burylyp jatqanda tikushaqty jerden lańkester atyp túsirdi, sóıtip, tikushaq sırıalyq úkimettik áskeriniń baqylaýyndaǵy aımaqqa qulady. Tikushaq ekıpajy qaza tapty", - dep habarlady vedomstvo ókilderi.  

Qaza bolǵan pılottar memlekettik nagradalarǵa usynyldy.

RT telearnasynyń málimetinshe, reseılik Mı-25 AQSH-ta shyǵarylǵan tank atatyn TOW zymyranǵa qarsy keshenimen atyp túsirilgen. Bul qarý Sırıaǵa 2013 jyldan beri jetkizilip jatyr, bul keshendi AQSH qana emes, Parsy shyǵanaǵyndaǵy elder de óndiredi eken. 
Al senbi kúni arab BAQ-tary reseılik tikushaqqa jasalǵan shabýyl beınelendi dep bir vıdeojazbany jarıalady. Alaıda kadrlardan tikushaqtyń markasyn, oqıǵanyń qaıda jáne qashan bolǵanyn anyqtaý múmkin emes. 

Aıta keteıik, Sırıadaǵy áskerı operasıalar bastalǵaly beri reseılik áskerıler osymen eki tikushaqtan aıyryldy. 12 sáýirde reseılik Mı-28N Homs aýdanynda qulaǵan bolatyn. Eki ushqysh ta qaza tapqan. Al taǵy bir Mı-8 tikushaǵy 24 qarashada Sý-24 bombalaýshy ushaǵynyń ekıpajyn qutqarý boıynsha operasıa kezinde joǵalǵan edi. Aıta keteıik, Sý-24 bombalaýshysyn Túrkıanyń joıǵyshtary atyp túsirgen bolatyn.