Qazaqstannyń İshki ister mınıstrliginiń Tergeý departamenti Astanada stýdent Erasyl Áýbákirovtiń ólimi boıynsha isti tergeýdi aıaqtady, - dep habarlaıdy Qamshy.kz Tengrinews.kz -ke silteme jasap. Bul týraly QR İİM memlekettik til jáne aqparat departamentiniń dırektory Almas Sádýbaev habarlady.

"E.O.Áýbákirovtiń ólimi deregi boıynsha qylmystyq istiń sotqa deıingi tergeýi aıaqtaldy. Qazirgi ýaqytta qylmystyq is boıynsha jábirlenýshiler men olardyń ókilderine, kúdiktilerge, sonymen qatar olardyń qorǵaýshylaryna tergeý áreketteriniń aıaqtalyp, qylmystyq is materıaldarymen tanysýdyń bastalǵany habarlandy", - dep habarlady redaksıanyń resmı saýalyna berilgen jaýapta Almas Sádýbaev.

Alaıda QR İİM ókilderi sotqa deıingi tergeýdiń málimetterin jarıa etpeı otyr. "QR QPK talaptaryna sáıkes, sotqa deıingi tergeýdiń málimetteri jarıa etýge jatpaıdy. Málimetter prokýrordyń ruqsatymen, eger tergeý múddesine qaıshy bolmasa jáne ózge tulǵadardyń quqyǵyn buzý men zańdy múddelerin buzbasa jarıa etilýge jatady", - dep habarlady İİM ókilderi. 

Osyǵan deıin Erasyl Áýbákirovtiń ólimi boıynsha iste Aıan Meıirbaevtyń kepilaqymen bosap shyqqany belgili bolǵan edi. Aıan Meıirbaevqa qatystyqylmystyq qýdalaý toqtatylǵan bolatyn.

Eske salaıyq, 23 jastaǵy Erasyl Áýbákirovtiń zorlyq belgileri bar máıitin polıseıler 10 aqpanda tapqan bolatyn. Kisi óltirdi degen kúdikpen tórt adam ustaldy. Erasyl Áýbákirov elordadaǵy medısınalyq ýnıversıtettiń altyn kýrsynyń stýdenti edi. Ol 3 aqpanda úıinen shyǵyp ketip, qaıta oralmaǵan. Kelesi kúni onyń joǵalǵany jaıly habardy dostary taratty.