Byltyr jeltoqsan aıynda AQSH prezıdenttiginen úmitkerlerdiń biri, mıllıarder Donald Tramp Prezıdent bolsa AQSH-qa musylmandardyń kirýine tıym salatynyn aıtqan bolatyn. Bul pikiri túrli saıasatkerlerdiń synyna da ushyrasa da Tramp óz ustanymynan taımaǵan. Musylmandarǵa qarsylyq onyń saılaý aldy kampanıasynyń basty ustanymyna da aınalǵandaı. Bul másele onyń básekelesi H.Klıontonge túrtki salǵan. «Respýblıkalyq partıanyń ókili AQSH prezıdenti bolmaýy kerek. Óıtkeni ol óz ustanymy arqyly musylmandardy arandatady» deıdi, eks-memlekettik hatshy. H.Klınton sondaı-aq, «Donald Trampty terorızm maqsattaryna jetý úshin paıdalanyp jatyr» degen pikirde.
«Islam-today»-diń aqparaty boıynsha, eks-memlekettik hatshymen qatar qazirgi Prezıdent Barak Obama da Tramptyń musylmandardy el terıtorıasyna kirgizbeý jónindegi usynysyna qarsy. «AQSH-qa musylmandardyń kirýine tıym salý terorızm máselesin sheshpeıdi, kerisinshe qoǵamdaǵy retsizdikke ákelip soǵady. Orlando, San-Bernardınodaǵy lańkester de AQSH azamattary edi ǵoı» degen ýáj aıtty Obama. Al shotlandıalyq ıslam dindiler Trampty óz elderindegi meshitke kirip shyǵýǵa shaqyrdy. Shotlandıadaǵy musylmandar qaýymdastyǵynyń taratqan málimdemesinde «AQSH prezıdenttiginen úmitker D.Tramp sóz sóılegen saıyn musylmandarǵa tıisedi, jalpy ol musylmandar týraly kóbirek bilý úshin bizdiń meshitke shaqyramyz» delingen.
Maýsym aıynyń basynda ıslam dindilerge qatysty kezekti qarsylyq sózin aıtqan Tramp musylmandardyń sot qyzmetin atqarýyna bolmaıdy degen málimdeme jasady. Onyń bul pikiri respýblıkalyq partıanyń ózge músheleriniń narazylyǵyn týdyrǵanǵa uqsaıdy. «Amerıkanyń musylmandardyń quqyǵyn qorǵaý uıymy Donald Tramptan musylmandardyń namysyna tıetin sózderdi aıtqany úshin kópshiliktiń aldynda keshirim suraýyn talap etip, málimdeme jasady» dep jazady «IBTimes».
Osyndaı qarsylyqtar kóbeıgen soń ba, Prezıdent taǵynan úmitker Tramp byltyrǵy ustanymynan bas tarta bastaǵandaı. Saıasatkerdiń kómekshileri «Ol jalpy musylman emes, terorızm oshaǵyna aınalǵan elderdiń ókilderine qatysty aıtqan edi» dep, Trampty aqtaǵan aqparat taratty. Biraq sol «terorızm oshaǵyna aınalǵan elderdiń» aty atalmaǵan. Sondaı-aq, telearnalardyń birine bergen suhbatynda Tramp AQSH-qa terorızm oshaǵyna aınalǵan elderdiń ókilderin de kirgizýge bolatynyn, tek ol úshin jaqsylap tekserý kerek degen usynys aıtty. Qurama Shtattarǵa kiretin musylmandar qalaı tekseriledi, ol jaǵy da beımálim.
13 maýsymdaǵy Orlandodaǵy terraktiden keıin AQSH saıasatkeri Prezıdent bolyp saılansa, terorızmdi túbegeıli joıý kerektigin túsingenge deıin ımıgrasıaǵa shekteý qoıatynyn jáne terorızmmen myqtap kúresetinin jetkizdi. Saıasatkerdiń osyndaı qubylmaly pikirlerinen keıin «Tramp Prezıdent bolyp saılansa musylman qaýymyna qaýip týdyra ma?» degen suraq týyndaıdy. Bul máseleniń anyq-qanyǵy qarasha aıyndaǵy saılaýdan keıin belgili bolady.
Dana Qamshybek
