Almatydaǵy Memlekettik Ortalyq mýzeıde el táýelsizdiginiń 25 jyldyǵy jáne Almatynyń 1000 jyldyǵyna oraı mýzeı qoryndaǵy ydys-aıaq koleksıasynan «Syrly aıaqtyń syny ketpes» atty kórme ashyldy, - dep habarlaıdy Qamshy.kz.

Qazaq halqy erte zamannan ydys-aıaqqa baı. Ydys-aıaqtar máni jaǵynan tek tutyný buıymy ǵana emes, ulttyq dúnıetanymda alar orny erekshe ekeni belgili. Halqymyz kúndelikti turmysta paıdalanǵan ydystar ǵuryptyq  qyzmet te atqarǵan. Máselen, toqshylyqtyń (qazany toq, ýaıymy joq), syı-qurmettiń,  (dámdes, tabaqtas bolý), bereke-birliktiń, tatýlyqtyń, (aıaq-tabaǵy bólinbegen, bir qazannan as ishken), t.b.

Ydys-aıaq túrleri tabıǵı-klımattyq jaǵdaıǵa, halyqtyń turmysy men sharýashylyǵy tikeleı baılanysty. Dástúrli ortada kóshpeli turmys talaptaryna saı ydys-aıaq túrleri, negizinen, aǵash, teri tárizdi synyp-búlinýge kóp ushyraı bermeıtin materıaldardan jasalǵan. Sonymen birge metaldan, saz balshyqtan kúıdirip jasalǵan ydys-aıaqtar da erteden qoldanylyp kele jatyr. Osyndaı ydystar Ortalyq mýzeı qorynda saqtaýly eken.

Kórmege Ortalyq mýzeı qoryndaǵy 100-ge jýyq ydys-aıaq qoldanylý aıasyna baılanysty toptastyrylyp qoıylǵan. Kórmeden as-taǵam ázirleýde qoldanatyn qazannyń túrlerin, onyń qosymsha quraldary – kepser, súzgi jáne sý qaınatatyn mys quman, sháınek, samaýryndy, taǵamdy saqtaý men tasymaldaýǵa paıdalanatyn saba, mes, kúbi, qumyra, shelek, torsyqtardy, pisken asty taratyp quıýǵa arnalǵan ojaý, saptyaıaq, astaý, tabaq, tostaǵan, kersen sekildi ydystardy, sondaı-aq, daıyn asty iship-jeýge arnalǵan sapal ( kese túri), kárlen, qasyq, pıala, zeren, shynyaıaq tárizdi ydys-aıaqtardy tamashalaýǵa bolady.

Dana Qamshybek