Búgin Ulttyq bank bazalyq mólsherlemeni 13 paıyzǵa deıin tómendetti. Bul ınflásıa deńgeıin jyl sońyna deıin 6-8 paıyz kóleminde ustap turýǵa múmkindik beredi eken, - dep habarlaıdy Qamshy.kz KTK arnasyna silteme jasap.
Ulttyq bank tóraǵasy Danıar Aqyshevtyń aıtýynsha qarjy naryǵyndaǵy turaqtylyq pen valúta, depozıt naryǵyndaǵy oń úderister bazalyq mólsherlemeni azaıtýǵa septigin tıgizip otyr. Tipti álemdik bırjadaǵy qara altyn qunynyń qymbattaýy da elimizdegi ekonomıkalyq ahýaldyń az da bolsa jaqsarýyna yqpal etken. Iaǵnı teńge baǵamy turaqtalyp, halyq qoldaǵy shetel valútalaryn jappaı sata bastapty. Máselen sońǵy tórt aıda azamattar aqsha aıyrbastaý bólimsheleri arqyly 947 mıllıon dollardy tól teńgege almastyrǵan. Osydan keıin bazalyq mólsherlemeni tómendetýge sheshim shyǵaryldy. Bul kórsetkish aldaǵy tamyz aıynyń 15-ne deıin jaramdy.
-Bazalyq mólsherlemeniń tómendeýinen qandaı da bir jyldam ózgerister bolmaıdy. Sebebi ekonomıkamyz jańa talapqa endi ǵana beıimdelip keledi. Sondyqtan bankter birden nesıelendirýdi ulǵaıtady dep aıtý qıyn. Biraq jyl sońyna deıin ekinshi deńgeıli bankterdiń nesıe berýi jıileýi múmkin, - deıdi QR Ulttyq bankiniń tóraǵasy Danıar Aqyshev.
