Buǵan deıin dopıng paıdalandy dep aıyptalǵan qazaqstandyq aýyratletterdiń qatary taǵy bir sportshymen tolyqty. Álem jáne Azıa chempıony, Pekın Olımpıadasynda 4-oryn alǵan Vladımır Sedovtyń da dopıng-synamasynan WADA (búkilálemdik dopıngke qarsy agenttik) mamandary tyıym salynǵan preparat tapty, - dep habarlaıdy Qamshy.kz Sn.kz -ke silteme jasap.
Mamandar Sedovtyń Pekın olımpıadasy kezinde tapsyrǵan dopıng-synamalaryn qaıta tekserýden ótkizgen. Mundaı talapty Halyqaralyq Olımpıada komıteti usynypty.
Tekserý nátıjesinde Sedovtyń "A" synamasynda stanozolol zatynyń bar ekeni anyqtalǵan. Qazir onyń "B" synamasy tekserilip jatyr jáne nátıjesi kelesi aptada belgili bolady.
Aıta ketý kerek, Halyqaralyq aýyr atletıka federasıasy Sedovty 2006 jyly sporttyq jarystardan 2 jylǵa shettetken bolatyn. 2008 jyldyń mamarynda ol úlken sportqa qaıta oraldy.
"Maǵan sený-senbeýlerińiz óz erikterińizde, biraq, men tyıym salynǵan zattardy paıdalanbaǵanyma ant etemin. Tipti, eń alǵash ret meni sporttan shettetken kezde de men federasıa sheshimimen kelispeıtinimdi bildirdim. Men árqashan ádil jeńip, ádil jeńilgen sportshymyn. Dopıngti eshqashan paıdalanǵan emespin", - deıdi Sedovtyń ózi.
Esterińizge salaıyq, buǵan deıin WADA Ilá Ilın, Zýlfıa Chınshanlo, Maııa Maneza men Svetlana Podobedovalardy dopıng paıdalandy dep, jarystardan ýaqytsha shettetken bolatyn. Sol sátte Vladımır Sedov Ilındi de, ulttyq quramanyń bas bapkeri Alekseı Nıdi de aıyptaǵan edi. Tipti, Ilındi chempıon retinde moıyndamaıtynyn da aıtqan.
