15 shildede keshki ýaqytta áskerı tóńkerilis áreketi bolǵan Túrkıadan bir-birine qarama-qaıshy habar jetip jatyr, - dep habarlaıdy Qamshy.kz Tengrinews.kz -ke silteme jasap.
Túrkıanyń Bas shtaby el bıliginiń ustalǵanyn, alaıda qazirgi barlyq halyqaralyq qarym-qatynastardyń jalǵasatynyn málimdep otyr. Alaıda keıin el prezıdenti Taıyp Erdoǵan Skype arqyly úndeý jasap, adamdardy kóshege shyǵýǵa, tártipsizdikti toqtatýǵa shaqyrdy. Túrik Prezıdenti áskerı tóńkeris uıymdastyrǵandardy qatań jazalaýǵa ýáde berdi, - dep jazady Rıa Novostı.
"Úkimettiń jaýy kóp. Bul áreketti jasap jatqandar ókinetin bolady. Biz bul basyp alý áreketin taıaýda joıamyz", - dedi ol.
Efırinde Erdoǵannyń sóılegeni jaıly vıdeojazba kórsetilgen CNN Turk telearnasy Túrkıa prezıdentiniń qaýipsizdikte ekenin habarlady, sebebi tóńkeris áreketi kezinde ol Bodrýmdaǵy kýrortta bolypty. Al taǵy bir derekkóz Erdoǵandy kúzettiń Marmarıs portyna jetkizgenin habarlap otyr.
NTV telearnasynyń efırinde Erdoǵan memlekettik tóńkeris jasamaqshy boldy dep opozısıalyq ıslam ýaǵyzshysy Fethýllah Gúlendi aıyptady. Ol qýdalaýdan keıin AQSH-ta turady. "Tóńkeris jasaý áreketi jaıly belgili boldy. Men bar halqymdy kósheler men alańda kútemin. Biz laıyqty jaýap qatamyz. Bul árekettiń "Paralel memlekettiń" jasaǵanyn bilemiz. Olar qatal jazalanady", - dedi memleket basshysy.
Erdoǵannyń bul úndeýinen keıin Ankara, Ystambul jáne Izmır turǵyndary kóshege shyǵyp, elde memlekettik tóńkerilis jasaý áreketine narazylyq bildire bastady. Adamdar áskerı tehnıkanyń qozǵalysyna kedergi bolyp jatyr, dep habarlaıdy túrik telearnasy. Erdoǵannyń jaqtaýshylary "Iyq tiresip, tóńkeriliske qarsy turaıyq!" dep urandatyp jatyr.
Al Túrkıa kóshelerinde tankter júrip jatyr. Ystambul áýejaıynyń mańynda atystardyń estilip jatqany da habarlanyp otyr. Álemdik áýe kompanıalary Túrkıaǵa ushatyn reısteriniń barlyǵyn toqtatyp, ushaqtardy aspannan keri qaıtaryp alyp jatyr. Kóptegen eldiń bıligi azamattaryn kóshege shyqpaýyn eskertý ústinde.
Ankarada túnde birneshe alapat jarylys bolypty. Tankterdiń Túrkıa parlamentiniń ǵımaratyn qorshap alǵany aıtylady. Anadolu agenttiginiń málimetinshe, Ankaradaǵy Gelbashı aýdanynda áskerı tóńkerilis áreketi barysynda polısıanyń 17 qyzmetkeri qaza tapqan.
Internette tóńkerilis áreketiniń barysynda bolǵan jarylystyń vıdeosy jarıalandy. Keıbir málimetter boıynsha, jarylys parlamentte bolǵan, al basqa derekkózder bul vıdeoda teleortalyqtyń bolǵany aıtyp otyr.
Túrkıa premer-mınıstri Bınalı Iyldyrlym Focus basylymyna tóńkerilisshilerdiń birneshe lıderiniń ustalǵanyn málimdedi: "Tóńkerilis áreketiniń birneshe lıderi ustaldy. Demokratıa jeńedi", - dedi ol. Sonymen qatar, Túrkıa áskerı áýe kúshteriniń F-16 joıǵyshynyń memlekettik tóńkeriliske qatysýshylardyń Sikorsky áskerı ushaǵyn atyp qulatqany habarlandy.
Túrkıada áskerı tóńkerilis jasaý áreketiniń júzege aspaǵany jáne ony uıymdastyrýshylarynyń qamaýǵa alynyp jatqanyn Ystambul gýbernatory Vasıp Shahın habarlady. "Áskerı tóńkerilis áreketi júzege aspady. Búlikti uıymdastyrýshylardy ustap, qamaý sharalary júrip jatyr", - dedi ol senbi kúni NTV telearnasyna bergen suhbatynda.
Telearna tilshileri Býrsa provınsıasynyń jandermerıasynyń basshysy ustalǵanyn habarlady. Ulttyq barlaý uıymynyń málimetinshe, Túrkıada áskerı tóńkerilis áreketin ÁÁK pen jandarmerıa qolbasshylyqtary uıymdastyrǵan.
Túrkıa prezıdenti Ystambul áýejaıynyń aldyna jınalǵan jaqtastarynyń aldynda málimdeme jasady. Erdoaǵan tóńkerilis máselesiniń beıbit túrde sheshiletinin atap ótti. Ol Bas shtabtan "satqyndardy" shyǵaryp, áskerde "tazalyq" jumystaryn júrgizetinin aıtty. Onyń aıtýynsha, tóńkerilis áreketi tolyqtaı basylady, al ofıserler, onyń ishinde armıanyń basshylyǵyn qamaý sharalary júrip jatyr.
Reuters málimetinshe, Erdoǵan óz sózinde ýaǵyzshy Gúlendi búlikti shyǵardy dep aıyptady, aıtýynsha, ol Pensılvanıadan buıryq bergen.
Túrik prezıdenti Marmarıstegi qonaqúıden shyǵyp ketkennen keıin ol jaqqa qarýly shabýyl jasaǵanyn málimdedi.
Erdoǵan túrik halqymen birge bolatynyn jáne eshqaıda ketpeıtinin málimdedi.
Eske salaıyq, 15 shildede Túrkıada áskerıler tóńkerilis jasaýǵa árekettendi. Atystar týraly birinshi habar Astana ýaqyty boıynsha 01.00-de jetken. Halyqaralyq agenttikterdiń málimetinshe, Ankarada atystar estilgen, qala ústinde joıǵysh ushaqtar men tikushaqtar ushyp júr, al Ystambuldaǵy áýejaıǵa tankter jetkizilgen. Elde memlekettik telearnaral habar taratýyn toqtatty. Ankarada Facebook jáne Twitter áleýmettik jelileri qulyptaldy.
