Aqtóbede jyl basynan beri 2 myń múıizdi iri qara men 800-den astam usaq maldan brýselez anyqtaldy, - dep habarlaıdy Qamshy.kz Bnews.kz -ke silteme jasap.
Saryp aýrýy anyqtalǵan maldyń barlyǵy et óńdeý sehtaryna jiberilip, aýrý juqtyrǵan 16 adam emdeldi. Bul týraly oblystyq tutynýshylardyń quqyqtaryn qorǵaý departamentiniń basshysy Nursulý Berkimbaeva aıtty.
-Bıyl oblysta 16 adam saryp aýrýyn juqtyrdy. Úsheýiniń jasy 14-ke tolmaǵan. Tekserý kezinde 13 jaǵdaıda adamdarǵa saryp aýrýy múıizdi iri qara jáne usaq maldan juqqany anyqtalyp otyr. Al ózge úsheýiniń qalaı brýselez dertine shaldyqqany áli kúnge deıin belgisiz,- deıdi oblystyq tutynýshylardyń quqyqtaryn qorǵaý departamentiniń basshysy Nursulý Berkimbaeva.
Aıta keteıik, osy jyldyń alǵashqy jarty jyldyǵynda óńirdegi 240 myńǵa jýyq múıizdi iri qaradan qan synamasy alynyp, olardyń 2 myńnan astamynan brýselez derti anyqtaldy. Al tekserilgen usaq múıizdi maldyń 878-i saryp aýrýyna shaldyqqan eken. Brýselez anyqtalǵan mal etiniń barlyǵy et óńdeý sehyna tapsyryldy.
«Qazirgi kezde Oıyl, Mártók, Temir men Hromtaý aýdandaryndaǵy kórsetkish oblystyq deńgeıden joǵary. Al saryp aýrýy anyqtalǵan mal ıeleri serologıalyq ádispen tekserilip, olardyń 200-inde oń nátıje baıqaldy. Adamdardyń barlyǵy medısınalyq baqylaýǵa alyndy»,- deıdi N.Berkimbaeva.
