Oılashy, jas kúnińde qandaı ediń?

Óziń teńdes qyzdardyń mańdaıy ediń.

Kóp qyzdar bir lap eter shyrpy bolsa,

İshinde janyp turǵan shamdaı ediń.

Oılaımyn, ol kezde men qandaı edim?

Bir jumbaq sheshilmegen sandaı edim.

Ózińmen dos bop birge júrgenimde,

Armanǵa qoly jetken jandaı edim...

Kirshiksiz kezimiz ǵoı – bala beıne,

Qalypsyń júregimde dara beıne.

Úılenip bala súıip, es kirse de,

Saǵynyp sol kezdi eske alam keıde.

Ózińdi bir kórýge asyǵýshy-em,

Ózgeden bul sezimdi jasyrýshy-em.

Qasyna Serikgúldiń erip alyp,

Kózime ottaı ystyq basylýshy-eń.

Degendeı-aq basqadan baq tabalyq,

Júrektiń óz qalaýyn saqtary anyq.

Qımas sezim júrsede jandy qınap,

Ádebinen dostyqtyń attamadyq.

Kezderiń-aı, qoldap meni sılaıtynyń,

Men shalqyp keń dúnıege sımaıtynmyn.

Oılaýshy-em dál osylaı júre bersek,

Ózge túgil seni ózime qımaıtynmyn.

Ýaqyt biraq oǵan qaratpady,

Sen– Toly, me– Qobyqqa ary attadym.

Arada qımas sezim– dostyq qaldy,

Baqytty et jan dosymdy jaratqanym.

Basqa jan bas aýyrtyp moıyn burmas,

Dosyń jaqsy ómirde bolsa syrlas.

Basqa dostyq bilmeımin turar-turmas,

Qyz-jigittiń dostyǵy umytylmas.

Nurbaqyt Baırahmetuly