Oıdym- oıdym joldardan orǵyp ótip,

Qojyr- qojyr tastardan qarǵyp ótip.

Baıanaýyl jettik- aý uzaq júrip,

Jol kezikse tep- tegis qalǵyp ketip...

Baıanaýyl – taýyń kórkem, tasyń qyzyq,

Sýretteı beıne qolmen qoıǵan syzyp.

Tobylǵy, yrǵaı, arshamen jýsan ısi –

Eske sap bala kezdi kóńilim buzyp...

Ný orman kómkerilgen salań qandaı,

Qulpyrǵan alýan gúlmen dalań qandaı!

Uqsaıtyn biri kisi, biri ańǵa

Jartasyń beıne qolmen qalanǵandaı.

Aınadaı jarqyraǵan – Jasybaı kól,

Boıyńda qanyń bolsa tasymaı kór.

Arýlar – aqqý qustaı sýda júzer,

Degendeı jigit bolsań jasymaı kel..

Sanańdy sarsań oıdan silkileıdi,

Naızaǵaı oınap, kún sátte kúrkireıdi.

Jaýyp turyp lezde ashylady,

Ashyq turyp aqjaýyn sirkireıdi.

Jer eken bir ózgeshe jaratylǵan,

Búldirgen, qaraqaty oratylǵan.

Alashtyń alyptary kóp shyǵypty:

Aqyn, ánshi, ǵalymy dara týǵan.

Eske tústi- aý baldáýren, salqyn Saýyr,

Tebisken qulyn- taıdaı aǵa- baýyr.

Ánine Jaıaý Musa arqaý bolǵan –

Qosh- esen bol kórgenshe Baıanaýyl!!!

       Nurbaqyt Baırahmetuly