Búgin Atyraýda Jer reformasy boıynsha qurylǵan komısıanyń kezekti otyrysy ótti. Asqar Myrzahmetovtiń tóraǵalyǵymen ótken jıynda komısıa músheleri túrli pikirleri men oılaryn ortaǵa salyp jatqan. Sheneýnikterdiń «tátti» áńgimesi men tikeleı efırdi túrmede tergeýde jatqan qoǵam belsendileri Talǵat Aıan men Maks Boqaevtiń analary úzdi, - dep jazady Skifnews.kz. Bul týraly Qamshy.kz habarlaıdy.
Aq jaýlyqty apalardyń ekeýi de muǵalim. Uldarymyzdy patrıot jáne ádil etip ósirdik degen olar, ToqtarTóleshov týraly ertegini 7-synyp oqýshylaryna aıtyńdar deıdi.
«Men eshkimge senbeımin, sondyqtan bar shyndyqty osy halyqtyń aldynda aıtqaly otyrmyn. Sebebi, erteń 10-15 kúnen keıin balamnyń soty bolady. Meniń balam áppaq, ózim mektepte muǵalim bolyp 35 jyl jumys istedim. Balamdy óte jaqsy tárbıeledim. Mektepti qyzyl atestatpen bitirdi, sosyn Ál-Farabı atyndaǵy ýnıversıtettiń zań fakúltetine túsip, ony da bitirip shyqty... Balamnyń statásy meniń qolymda tur. On qaıtara oqyp shyqtym. Útir-núktesine deıin bilemin, jattap aldym. Endeshe tyńdańyzdar, aıtaıyn... Tóleshov degen bireý bar eken Shymkentte. Ol meniń balamdy syrtynan kóripti de unatyp qalypty, sodan 100 myń dollar aqsha jiberipti. Ol aqshany kómekshisine bergen, kómekshisi óziniń kómekshisine bergen, ol Aqtaýǵa jetkizgen, Aqtaýdaǵy bireý 1000 teńgege taksı ustap, Atyraýǵa kelipti de aqshany Talǵatqa beripti. Osyndaı ertegige senesizder me? Mynany meniń 7-klasta oqıtyn balalaryma aıtsa senbeıdi ǵoı. Sizder qalaı senip otyrsyzdar?», - deıdi Uldaı ana.
Ol Atyraý oblysynyń ákimi Nurlan Noǵaevqa «sózińde turmadyń» dep renishin aıtty. Sonda da balasyna arasha túsetinine úmittenetinin jetkizdi.
«Men ózim 24 sáýir kúni mıtıńke shyqqan joqpyn, biraq vıdeosyn bastan-aıaq kórdim. Balamnyń ne aıtqanynyń bárin bilemin. Noǵaev myrza, sol jerden sizdi kórgende de qatty qýanǵan edim, bizdiń oblysqa da jaqsy basshy kelipti ǵoı dep. Biraq, siz sózińizde turmadyńyz ǵoı, nege jaýǵa ustatyp berdińiz balamdy? Aıtyńyzshy? 24 sáýirden keıingi mıtıńten 1 apta ótken soń balamdy qamap tastady, biraq 21 mamyrdaǵy mıtıńke qatysy bar dep aıyptap otyr. Aıtyńyzdarshy, ol bul ýaqytta túrmede jatty ǵoı, túrmede jatqan adam qalaı mıtıńti basqarady, eldi qalaı úgitteıdi túrmedegi adam?», - deıdi ashynǵan ana.
Esterińizde bolsa, 24 sáýirde Atyraýda bolǵan mıtıńten keıin oblys ákimi Nurlan Noǵaev oǵan qatysqandardyń eshbiri jazalanbaıdy, qýdalanbaıdy dep ýáde bergen bolatyn.
Maks Boqaevtiń anasy Rahıla Qojasova - 42 jyl pedagog bolǵan, búgingi tańda zeınettegi qarıa. Ol da óziniń ulynyń mundaı qylmysqa barǵanyna senbeıdi.
«Árbir qazaq óziniń ata-babasynan qalǵan jerdiń birtutastyǵyn qalaıdy, kim kóringenniń qolynda ketpegenin qalaıdy. Sol úshin beıbit sherýge shyqqan halyq ún tastady, pikir bildirdi. Onyń memlekettiń qaýipsizdigine qandaı qatysy bar ekenin men túsinbeı otyrmyn. Bul kóterilis emes, bul bar-joǵy pikir bildirý ekenin nege túsinbeımiz? Mıtıńke shyqqandardy jaý dep esepteý - patrıotızmge qarsy qaǵylǵan syna dep esepteımin», - deıdi ol.
