«Bul apta eki jańalyqpen bastaldy. Biri – sýyq habar. Almaty aýrýhanasynda İİD jergilikti polısıa qyzmetiniń aǵa serjanty Serik Ábildaev pen Almaly aýdany İİB-niń ýchaskelik ınspektory Meırambek Rahmatýllaev qaıtys boldy. Almatylyq atqysh Rýslan Kúlikbaevtiń qolynan qaza tapqandar tizimi toǵyz adamǵa deıin artty. Ekinshi jańalyq, shynyn aıtqanda, aqylǵa qonbaıdy: barlyq el boıynsha jarıalanǵan lańkestik qaterdiń «sary» deńgeıine qaramastan İshki ister mınıstri Qalmuhanbet Qasymov aıaq astynan demalysqa ketti», - dep jazady «Vremá» gazeti.
Basylymnyń jazýynsha, QR Qylmystyq kodeksiniń alty baby boıynsha qozǵalǵan R. Kúlikbaev isin tergeýge QR Bas prokýratýrasynyń arnaıy prokýrorlar departamentiniń qyzmetkerleri kirisipti. Sonymen qatar, quqyq qorǵaý organdary R. Kúlikbaevtiń taǵy tórt tonaý, eki urlyq oqıǵasyna qatysy bar-joǵyn tekserip jatsa kerek.
Bas polıseıdiń demalysqa ketýine tańdanys bildirgen basylym Almatydaǵy teraktige qatysty tergeý barysynda belgili bolǵan birqatar jáıttarǵa da toqtalypty.
«Osy oqıǵaǵa baılanysty túrli materıaldarda Almaly AİİB kezekshisiniń radıohabarlary bar: ol (kezekshi – red.) polısıa basqarmasyna shabýyl jasalǵanyn habarlaıdy, bir mınýt ótisimen ǵımaratqa jaqyn mańda júrgen patrúlderdi shaqyrady. Olarǵa saýytty keýdeshe kıýdi, AİİB-de atys bolyp jatqanyn aıtady. Biraq, ǵımarat ishinde ondaǵan polısıa, qarýly kezekshi aýysym júrgende qaladaǵy patrúlderdi shaqyrýdyń qajeti qansha? Odan bólek, AİİB janynda ornalasqan İİD ǵımaratyn ádettegi saqshylardan bólek arnaıy jasaqtyń 10 jaýyngeri (mergen, saper, mına izdeýshi jáne 7 shabýyldaýshy) kúzetedi. Onyń jaýyngerleri lańkestikke qarsy arnaıy operasıalarǵa qatysqan, jaýyngerlik tájirıbeleri bar, qarý qoldanýdy jaqsy meńgergen. İİM basshylyǵy osy kásipqoı jaýyngerlerdi nege kótermegen?», - degen saýal tastaıdy «Vremá».
Basylym «Atalǵan jaýyngerler aýdandyq İİB ǵımaratyna sanaýly sekýndtarda jetip, jalǵyz atqyshty zalalsyzdandyrar edi ǵoı» degendi qosa aıtady. Eger jaýyngerlerge shynymen sondaı pármen túskende, oqıǵanyń saldary da munsha aýyr bolmas pa edi.
Budan ári maqalada oqıǵa kýágeri, dál polısıa ǵımaratyna shabýyl jasalǵanda İİB-niń besinshi qabatynda júrgen Valerıı Shınkarnenkonyń sózderi keltiriledi. Ol sol kúni polısıaǵa telefonyn urlatqany jóninde aryz jazýǵa barypty (Kýágerdiń sózi TV-ge bergen suhbatynan sózbe-sóz kóshirilgen – red.).
«Men İİB-ge kelgende bekette jas leıtenant turdy. Men jáne tań qaldym: ofıserdiń avtomatpen, saýytty keýdeshemen turǵany nesi dep. Qolymda paket bolǵan, ol ishin 
kórsetýdi surady. Barlyǵyn muqıat tekserip bolǵan soń, maǵan kezekshi bólimge qalaı barý kerektigin túsindirdi. Ol jerde meni besinshi qabatqa – tegeýshilerge jiberdi. Men kóterilip, onda qyryq mınýttaı boldym.
Tómen túsip, kezekshi bólimniń tabaldyryǵyn attaı bergenimde daýys zoraıtqyshtan «Zahvat RÝVD» degen aıqaı estidim. Janymda azamattyq kıimde eki kisi bolǵan. Túsinýimshe, olar da ofıserler. Úsheýimiz joǵary qaraı júgirdik. Men qatty qorqyp kettim. Besinshi qabatta ońǵa buryldym. Artymda AİİB qyzmetkerleri júgirip kele jatty. Bir kabınettiń esigi jartylaı ashyq tur eken, onda úsh polıseı boldy, bireýi qolyna qarý ustaǵan. Terezeden qarap edik, bekette turǵan ofıser jerde jatty, betin qan jýyp ketken. Onyń basyna oq tıgen sıaqty kórindi. Biraz ýaqyt ótken soń ofıserler shyǵyp ketti, men de solardyń artynan erdim. Saýytty keýdeshe kıgen, avtomat ustaǵan qyzmetkerler joǵary kóterilip kele jatty. Olar ǵımaratty tazartýǵa kiristi. Men aqyryndap tómen túsip, birinshi qabatqa deıin jettim. Tómen túskenim sol edi, qaıtadan aıqaı shyqty. Biz tezdetip joǵary qaraı júgirdik. Taǵy oq atyldy. Biz úshinshi qabatqa deıin júgirdik. Birneshe áıel júr eken, olar bizdi keńse bólmesine kirgizdi. Onda temir esik boldy. Sol jerde eki saǵattaı bolddyq. Oq atylǵanyn, aıqaıdy estip otyrdyq. Ol (R. Kúlikbaev – red.) AİİB aýmaǵynda júrdi. Shynyn aıtqanda, qatty qoryqtyq...», - deıdi oqıǵa kýágeri.
Basylym kýágerdiń aıtqandaryna súıene otyryp «AİİB-de bolǵan polıseıler myltyq daýsyn estı sala kabınetterine tyǵylyp, patrúlderdiń kelýin kútip jatqan ba? Jigitter shoshyp ketken shyǵar, túsinikti. Ondaı qarýly shabýyldy kútpegen bolar. Biraq, olar jaı adamdar emes, polısıa ofıserleri emes pe?», - degen saýal tastaıdy.
«Qylmysker avtomat ustap kóshelerdi sharlap, ony polısıa qýyp júrgende qurban bolǵandar sany arta berdi. R. Kúlekbaev birinshi UQK departamentinde polısıa ekıpajyna oq jaýdyrdy, artynan shekara qyzmetiniń ofıserin óltirdi. Tek Almaty qalasy memlekettik kiris departamenti ǵımaratyn kúzetip otyrǵan «Kúzet» qyzmetkeri Aıan Ǵalıev óziniń ómirimen qosh aıtysa otyryp, qarýly qylmyskerdi zalalsyzdandyrdy. Eger starshına A. Ǵalıev onyń aldynan shyqpaǵanda oqıǵanyń arty ne bolaryn oılaýdyń ózi qorqynyshty» dep jazady basylym.
«Vremá» mınıstr Q. Qasymovtyń qaıtys bolǵan polıseılerdi aqtyq saparǵa shyǵaryp salý rásimderine qatyspaǵandyǵyna, jaraqat alyp, aýrýhanaǵa túsken polıseılerdiń kóńilin surap barmaǵanyna da nazar aýdartady.
«Almaty oblysynyń ákimi Amandyq Batalov Taldyqorǵannan Qaraqystaq aýylyna kelip, serjant Maqsat Sálimbaevtiń jerleý rásimine qatysty. Ol jerden aımaq basshysy Eńbekshiqazaq aýdanynyń Bólek aýlyna (eki aýyldyń arasy 200 shaqyrymǵa jýyq) bardy. Onda jol-patrýldik polısıa arnaıy batalónynyń aǵa ınspektory leıtenant Tımýr Begasylovtyń janazasy oqyldy. Qaza bolǵandardyń otbasyna A. Batalov «Asyl arman» turǵyn-úı kesheninen páter kiltin tabys etti. «Bul, árıne, qazanyń ornyn toltyrmaıdy. Biraq, ómir bir orynda turmaıdy, balalaryna, týystary men jaqyndaryna uzaq ómir tileıik» degen kóńilin bildirdi.
Osy kúni Almaty ákimi Baýyrjan Baıbek te qaza bolǵandardy aqtyq saparǵa shyǵaryp salý rásimine qatysyp, jaqyndarynan aırylǵan otbasylarǵa kóńil aıtty. Nursultan Nazarbaevtyń atynan Ǵalıev otbasyna eki bólmeli páter kiltin tabys etti. Qala basshysy keıin aýrýhanaǵa da baryp, aýyr jaraqat alǵan polıseılerdiń jaǵdaıyn bildi.
Al, İİM basshysy aýrýhanada da, polısıa qyzmetindegi óziniń jaýyngerlik joldastaryn jerleý rásiminde de tóbe kórsetpedi. Alaıda, ony Qaýipsizdik keńesiniń jedel jıynynda Nazarbaevtyń ÓZİ Almatyǵa is-saparǵa jibergen bolatyn. Qalmuhanbet Nurmuhanbetuly shynymen de aýrýhanaǵa baryp, ólimmen betpe-bet kelgen baǵynyshtylarynyń qolyn qysýǵa, jerleý rásiminde kóńil aıtýǵa ýaqyt tappaǵany ma? (...) Almatyda ótken qoshtasý sharasynda Baýyrjan Baıbektiń janynda Q. Qasymov ta turýy kerek edi ǵoı», - dep jazady basylym.
Al, UQK basshysy Vladımır Jumaqanov R. Kúlikbaevtiń qolynan qaza tapqan shekara qyzmetiniń ofıseri Azamat Ázimjanovti (qaıtys bolǵan soń) «Ulttyq qaýipsizdikti qamtamasyz etýdegi úlesi úshin» medalimen nagradtaý týraly buıryqqa qol qoıý úshin ýaqyt tapqan kórinedi. UQK Shekara qyzmetiniń basshysy general-maıor Darhan Dilmanov bolsa, bas polıseı sıaqty jedel hatpen shektelmeı Almaty oblysy Pıdjım aýylyna arnaıy baryp, baǵynyshtysynyń jerleý rásimine qatysqan.
Jalpy, UQK basshylyǵynyń bul máselede ózgelerge úlgi bolatyn isteri barshylyq. Aqtóbedegi jaǵdaıdan soń da komıtet tóraǵasy UQK-niń oblystyq departamenti basshysyn ornynan aldy. Al, Aqtóbe oblystyq İİD-niń basshysy emes, onyń orynbasary oryndyǵymen qoshtasty. Almatydaǵy jaǵdaıdan soń, Almaly aýdandyq İİB bastyǵy Asqar Bolatov óz erkimen laýazymynan bosatý týraly baıanat jazǵan eken. Jaqynda ol İİD basqarmalarynyń birine bólim bastyǵy bolyp taǵaıyndalypty. Odan bólek Almaty İİD-niń jergilikti polısıa qyzmeti, ákimshilik polısıa qyzmeti bastyǵy men onyń orynbasary qatań sógispen qutylypty. Al, mınıstr Qalmuhanbet Qasymovtyń ózi demalysqa ketken.
