Marqum Tumanbaı aǵamyzdyń «Oktábr – júregimniń merekesi» degen jaqsy bir poemasy bar edi. Ómirimde birinshi ret «Olımpıada – júregimniń merekesi» dep shattana almaı, jankúıerlik shabytym ot almaı, júregim sup-sýyq kúıi qalypty ǵana soǵyp tur.

Sheteldik sportshylar men jankúıerlerdi Rıo áýejaıynda polıseıler men órt sóndirýshiler «Tozaqqa qosh keldińder!» degen plakattarmen qarsy aldy. Jalaqy ala almaı qınalyp, jappaı ereýilge shyqqan beısharalardyń qoldaryndaǵy jáne bir plakatta: «Qaýipsizdikterińizge kepil bere almaımyz» dep jazylǵan.

Olımpıada alaýy Rıonyń kedeı aýdandaryn aınalyp, jyltyr marshrýtpen júrip ótti. Jol jónekeı alaý ustaǵandar súrinip-jyǵylýmen boldy. Ol az bolsa jemqorlyqqa narazy demonstranttardyń shabýylyna ushyrap jatty.

Keıbir Batystyń mamandary óz elderiniń sportshylaryn sý jarystary kezinde barynsha abaı bolýǵa, Rıonyń barlyq baseınderi men sý kanaldary kádimgi kanalızasıa qaldyqtarynan tolyq tazarmaǵanyn, jaǵajaılaryndaǵy muhıt sýynyń álemdegi eń las sý ekenin ashyq eskertti.

Olımpıadaǵa sanaýly aı qalǵanda el saıası-ekonomıkalyq daǵdarysqa urynyp, parlamenti prezıdentine ımpıchment jarıalady. Bir túrli. Toıǵa shaqyrǵan úıde «svet» óship qalǵandaı áser týyp tur. Qudaı artyn qaıyrly qylsyn.

Ǵalym Boqashtyń Feısbýktegi paraqshasynan alyndy