Turmysqa shyqpaı bosanǵandar, sábıin týa sala tastap ketkender, jeńil júriske salynǵandar... Bunyń bári áıelder. Jurt bulardy «tárbıesiz, arsyz» dep qaralap jatady. Nárestesin týa sala laqtyryp tastaǵany úshin sottalyp jatyr bireýler. Tún balasy kóshe kezip, aryn saýdalap, nápaqa taýyp júr qaptaǵan jezóksheler. Al endi qoǵamnyń osy  toby qaıdan shyqty? Qyzdar kúıeýge shyqqansha nege aryn saqtamaıdy? Elimizde jezóksheler nege kóp? Bunyń túpki negizi erkektermen baılanysty ekeni kóp aıtylmaıdy. Qyzdy buzǵan jigit te, qaryndasyna oıyna kelgenin jasaǵan aǵasy da «kináli emes». «Bárine kináli qyzdyń ózi», «durys tárbıe bermegen sheshesi  ońbaǵan». 

Eger bizdiń jigitter, aǵalarymyz, baýyrlarymyz jezóksheler úıine barmaı, barlyǵy jaryna adal bolsa she? Elimizde jezóksheler uıashyǵy joıylar edi ǵoı. Jeńil júristilerdiń sany kóbeımese azaıatyn túri joq. Myńdap sanalady. 2011 jylǵy derek boıynsha Qazaqstannyń İİM-de tirkeýde turǵan jezóksheler sany 4 myń eken. Odan beri qanshaǵa ósti? Buzylǵan áıel sanynyń kóbeıýine erkekter kináli emes pe? Ult densaýlyǵynyń basynda kim tur degende «ana men bala» dep jaýap beremiz.

Al elimizde buryn bolmaǵan juqpaly aýrýlardyń (jynystyq jolmen taralatyn) kóbeıip ketýine basty kináli haram júristi erkekter ekeni nege aıtylmaıdy? Solar emes pe, buzylǵan qatynnan juqtyryp ákep, tap-taza áıeline tasymaldaıtyn. Juqpaly aýrýlardyń kóptegen túrleri, tipti emdelýi múmkin emesteri qanshama? Jynystyq jolmen aýrý juqtyratynyn bile tura  azamattar jezkóshege nege qumar? Jaryn, ul-qyzynyń bolashaǵyn nege oılamaıdy?  Ult densaýlyǵynyń bir sheti er azamatardyń tán saýlyǵymen baılanysty ekenin jezókshege qumar jigitterdiń eskermeıtini ókinishti.

Dana Qamshybek