«Men de barlyq qyz bala sıaqty aq kóılek kıip, qosaǵymmen qosa aǵarýdy arman ettim» degen kelinshek on jyldyń ishinde qalaısha jeti kúıeýge shyqqanyn áńgimelep berdi.

«Eshkim jetiskennen jeti baıǵa tımeıdi» dep bastady otyzǵa da tolmaǵan Sholpan esimdi kelinshek.

«Alǵash ret on toǵyz jasymda turmysqa shyqtym. Óz erkimmen emes, árıne. Ol kezde tym jas boldym. Ońtústiktiń jazylmaǵan «zańy», oıdan shyǵarylǵan «salty» boıynsha meni kórshi aýyldyń jigitteri «urlap» ketken  bolatyn. Úlkenderdiń nusqaýymen sonda qalýyma týra keldi. Alaıda qalamaǵan, súımegen adamymmen tura almadym», - degen Sholpan bir jyldan soń ajyrasyp ketkenin aıtady.

Joldasynan ajyrasyp aýylda júre almaǵan ol aǵaıynnyń sózinen qashyp Astanaǵa ketedi.

«Astanada kún kóris qamyman dámhanalardyń birinde jumys istep júrip, sol jerde «slýjebnyı romandy» bastan ótkerdim. Admınıstrator jigit meni unatyp, qyr sońymnan qalmaıtyn. Birneshe aı birge turyp kórgen soń, úılenýge sheshim qabyldadyq» , - deıdi kelinshek.

Alaıdan, ekinshi nekede enesi kelinin qabyldaı qoımapty. Oǵan birden bir sebep – kelininiń buryn tabaldyryq attaǵany.

Ene men kelin jaraspaǵan soń, ortadaǵy ul ómirden baz keship, úıden ketip tynypty.

Osylaısha baqytty bolamyn degen Sholpan bir-aq kúnde kúıeýsiz qalǵanymen qoımaı, jumystan da aıyryla jazdady. Munyń jaǵdaıynan habardar dámhananyń ıesi buǵan ekinshi áıel bolýǵa usynys jasaıdy. Astanada barar jer basar taýy qalmaǵan kelinshek bir kúnniń ishinde úshinshi kúıeýge shyǵyp ketedi.

Baǵynan sory qalyń áıel endi durys ómir súrem be degende úshinshisi nashaqor bolyp shyǵady. Kúıeýiniń munysynan habarsyz bolǵan áıeldiń tańy taıaqsyz atpaıtyn bolady. Túnimen «shegip» kelgen kúıeýi tań ata esikti qaǵady da, eki qońyraýdan ashylmasa, «úıde kim bar edi» dep sabaı jóneledi.

Bir kúni sondaı «soǵystyń» ústinen túsken anasy kıimderin jınap qyzyn aýylyna alyp ketedi.

Aýylda bir jylǵa jaqyn jumyssyz jatqan «kúıeýden qaıtqan» qaıyn sińilisin jeńgesi «baqyt tilegen» bolyp taǵy bireýmen tanystyrady. Jeńgesiniń aıtýynsha onyń traktory bar, kórshi úsh aýyldyń bar adamy osynyń traktoryna qarap tur, tabysy keremet kórinedi. «Qalada shóp shegip, esirtki qoldanatyndardy kórgenim de jeter» dep oılaǵan áıel osy joly shynymen «barǵan jerime tastaı batyp, sýdaı sińemin» degen senimmen shóp shabatyn jigitke turmysqa shyǵady.

«Tórtinshi kúıeýge shyqqan soń ǵana túsindim. Eshkimge kerek emes ekenmin. Jeńgem de qyryq ótirigin aıtyp, menen qutylýdyń amalyn jasaǵan eken ǵoı» degen Sholpan bul kúeýiniń «ataqty» traktory bir kún júrse, bir aı júrmeıtin buzylǵysh, al ózi bir kún saý bolsa, eki kún mas bolyp júretin maskúnem bolyp shyqqanyn aıtady.

«Bárine qolymdy bir siltedim de Astanaǵa qaıtyp kettim. Jumys istep, eshkimge masyl bolǵym kelmedi», - deıdi Sholpan.

«Astanaǵa kelip qonaq úılerdiń birine jumysqa turdym. Bólmelerdi jınaımyn. Tabysym qara basymdy asyraýǵa jetip jatty» degen Sholpanǵa qonaq úıge kelýshi qaltaly azamattardyń biri «ǵashyq» bolyp qalypty.

«Qonaq úıde bólme jınaǵansha, qaltaly erkek qamymdy jasar» degen oımen kóńil qosyp, kelisimimdi berdim. Bir jyldan astam birge turdyq. Qyz balany ómirge ákeldim. Bári osy kezden bastap ózgerdi. Birinshi áıelinde bes qyzy bar kúıeýim men qyz týǵan soń birjola ketip tyndy. Oǵan men de, qyzym da kerek bolmadyq», - deıdi.

«Senesiz be, men ómirimde 30-ǵa kelmeı jeti kúıeýge shyǵamyn degen úsh uıyqtasam túsime kirmegen. Qyzymmen jumysqa da shyǵa almaıtyn boldym. Astanada qalaı kún kórem, páteraqy, tamaq bári qymbat. Bul ýaqytta burynǵydaı sheshem de joq, qaıtys bolǵan. Qaıda bararymdy bilmedim» degen Sholpan tipti kóshede qaıyr suraýdy da oılapty.

Alaıda osy joly baqytty bolaryna «kepildik» bergen jeńgesi 27 jastaǵy qaıyn sińilisin óziniń tórkin jaǵyndaǵy kórshisimen tanystyrady. Maqulǵa kelgen ekeýi shańyraq kóteredi. Rasynda meshitke baryp, neke qıdyryp, tipti nekelerin zańdastyrǵan da osy altynshy kúıeýi bolady.

«Ózime de, qyzyma da oń kózqarasta boldy. Endi 38-ge kelgenshe úılenbeı júrýiniń de bir sebebi bar shyǵar. Taǵdyr maǵan osy kisini jazypty» dep oılaıtynmyn. Alaıda sonsha jasqa kelgenshe úılenbeı júrýiniń sebebi bar eken da. Densaýlyǵynda kinárat bar meken, áıteýir ómirimdegi «jalǵyz» zańdy kúıeýim óz-ózine qol jumsap qaıtys boldy. Joldasymnyń qyryq kúndik asy ótken soń, men qaıyn jurtqa syımadym. Anyǵynda syıdyrmady. Bótensiń, bótenniń qyzy, ketińder degen áńgime aıtyldy», - deıdi Sholpan.

Taǵdyrdyń taýqymetin kóp kórgen kelinshek aýylda júrýdiń artyq ekenin túsinedi. Osylaısha taǵy da «úırengen» Astanasyna attanady. Bul joly qyzyn ýaqytsha balalar úıine ótkizip ketip, aıaqqa turyp alýdy oılaıdy.

Astanaǵa barar jolda jolserikpen áńgimesi jarasqan kelinshek ózin aýyldastary buzylǵan áıel dep sanaıtynyn aıtyp qynjyldy. Jolserik te ajyrasqan erkek eken, áńgimeleri jarasyp, tar kýpede qosyldy.

Osylaısha elge aıtpaı, jetinshi kúıeýge shyǵady. Degenmen alty kúıeýden qaıtqanyn betine basatyn jolserik kúıeý Sholpandy kúnde uryp-soǵýdan sharshamaıdy.

«Seniń ádemiligińe qyzyǵyp qaldym. Alty baıdan qaıtqanyńdy bilmedim dep kúnde bir áńgimeni aıtyp ura beredi. Ajyrasyp keteıin desem, qaıda, kimge baram? Keıin qyzymdy qalaı alam? Osynyń bárin oılasam, basym qatyp ketedi» degen kelinshek kópshilikten keńes surap, endigi bolashaǵyn qaıterin bilmeı otyr.

Indıra Qýat