Naýryz aıynyń orta sheni edi. Redaksıaǵa kirsem Marhabattyń kúreń shaıyn soraptap, oıǵa shomyp Ámirhan otyr eken. Kezdespegeli kóp bolyp edi, shúıirkelese kettik. Antıkalyq ádebıet, Shyńǵysqan taqyryptary aqyryndap qazaq qoǵamynyń qazirgi jaı-kúıine oıysty. Ol áńgimeni meniń kabınetimde shylym shegip otyryp sabaqtadyq... - Jazýshylar kerek bolmaǵan memleketke jýrnalıser kerek dep oılaısyń ba, Seke? -dedi bir mezette. Kúldim. Sebebi jaýap óz suraǵynyń astarynda jatyr edi. Shylymyn qushyrlana soryp: -Mysaly bizdiń ensıklopedıadaǵylardyń jumyssyz otyrǵanyna 3-4 aıdyń júzi boldy. QAZAQtyń ensıklopedıasy qazaq úkimetine kerek bolmaı tur. Qarjy joq?! Sáýirde jumys bastalady eken dep estidim, bastalmasa amalyn qarastyrý kerek, Marhadan uıat boldy... -Bul memleketke ensıklopedıa túgili qazaqtyń ózi de kerek emes sekildi ǵoı... -Ras aıtasyń. Meniń de senimim az. Jazý kerek edi. Oı kóp, jazaıyn desem "Kimge kerek, kimge kerekpiz?" degen suraq kóldeneń jatyp alady. Mysaly, 40-tan asqansha ádebıetti zerttedim, jazdym. Ne jetistikke jettim? Jekeshelenbegen úıim, maǵan úmittene qaraǵan áıel men qyzym bar... Arqadan qaqqanǵa máz bolyp júre berippiz. Marapat degen de mandymaǵan. İshindegi maqtan tutarlyǵy óziń taqqan Álıhannyń tósbelgisi... "Abaı" portalynyń jigitteri bir tamasha bastama kótergen edi. Álıhan Bókeıhanov atyndaǵy tósbelgi jasatyp, birneshe adamdy marapattaǵan bolatyn. Dáýren Qýattyń usynysy boıynsha sol tańdaýlylar arasyndaǵy Ámirhanǵa tósbelgini men taǵyp edim... 2 saǵattaı sóılestik. Ábekeń tolqyp otyryp talaı oıdyń basyn shaldy. Sodan keıin:-Jaraıdy, biraz ýqytyńdy aldym bir jerge baryp keleıin. Sodan keıin Marhabatty jetelep úıge qaıtyrmyn-dep kúldi. Saǵat 4 shamasynda qaıta soqty. Taǵy áńgime, kúlsalǵysh tuqylǵa toldy. Bul sońǵy kezdesýimiz eken. 1 aıǵa tolar tolmas ýaqyttan keıin Ámirhan kelmestiń kemesine minipti. Saparda júrip estidim. Jazǵanynan jazary kóp, bilimi ushan-teńiz taǵy bir azamat oralmasqa attandy. Imandy bolsyn! "Jazymyshtan ozymysh bar ma" deımiz qazaqylyqqa salyp. Tek Ámirhannyń keýdesinde "Kimge kerek, kimge kerekpiz?" degen sherli suraq ketkeni ókinishti... Baqul bol, baýyrym!

Serik Ábikenniń FB-paraqshasynan