Ózbekstan Prezıdenti Islam akanyń ınsýlti mıllıondardyń bas aýrýyna aınalyp ketýi múmkin be? Ábden múmkin. Ábden múmkin eger Islam aka naýqasynan aıyqpasa, ne onyń ornyna sondaı ámir-temir murager kelmese. Óıtkeni, Ózbekstan biraz jyldyń ishinde aımaqtyq derjavaǵa aınalyp úlgerdi. Óz terıtorıasyndaǵy ulystar men rýlardy, ózge ult ókilderin ózbek ultyna aınaldyrdy. Eshkimdi tyrp etkizbeıtin, bulǵaqtaǵandardyń basyn qaǵyp tastaıtyn temirdeı tártip júıesin quryp aldy. Syrtqy qaryzy joq. Ekonomıkasy ishki óndiriske negizdelgen. Tastúıin armıasy bar.

Mine, sondyqtan da Ózbekstan búgin Aýǵanystan tálipterine qarsy tura alatyn aımaqtaǵy jalǵyz kúsh, kimge bolsa da tótep bere alatyn tastúıin judyryq. Tálipterdiń Ortalyq Azıaǵa dendep enip ketýine kedergi bolyp otyrǵan - ózbektiń qýaty. Araqqa toıyp alyp tóbeles izdeıtin aýyldyń áýmeseri sıaqty Reseıdiń ózi Ózbekstandy múıizderde myń ret oılanady. Dúnıeni jalmap kele jatqan Azıanyń ajdahasy da ózbektiń tamaǵynan ótpeı qalatynyn jaqsy sezinedi. Óıtkeni, ózbek aǵaıyn ult pen memlekettiń birligine qajet zańdylyqtar men dástúr-salttardy, fılosofıa men dinin negizdep úlgerdi.

Ózbekstan búlinbesin. Bul jerde ıslamnyń tereń tamyry bar. Ózbekter shyn máninde ıslam dinine berik. Sol sebepti de ózbek bıligi din saıasatyn ýysynan shyǵarmaı keldi. Ýahhabızmdi jolatqan joq. Al, kishi Azıany astan-kesten etip jatqan dinı aǵymdar Ózbekstanǵa ótip ketse, ne bolatynyn kózge elestetýdiń ózi qıyn. Onda Sırıa men Iraktyń aınalasyndaǵy dúrbeleń jolda qalatyn shyǵar? Jer sharyn jeke menshigindeı kórip, qalaǵanyn jatqyzyp-turǵyzatyn kúshtilerge Ózbekstannyń álsiregeni kerek. Sonda olar bul jerde de saıası oıyndaryn erkin júrgizetin bolady. Otyz mıllıonnyń qolyna ot berip, alasapyranǵa salyp qoıý degen ne olarǵa? Onda Ortalyq Azıa otqa orandy deı berińiz. Onda Ortalyq Azıa talan-tarajǵa, ult taǵdyry - talapaıǵa túsedi. Betin aýlaq qylsyn ol páleniń! Ózbekstan búlinbesin.

Serik Janbolattyń Feısbýktegi paraqshasynan alyndy