Búgin 3 qyrkúıektiń taǵy Ózbekstan tańy Islam Kárimovsyz atty. Eldiń tuńǵysh prezıdenti Ózbekstan Respýblıkasy Densaýlyq saqtaý mınıstrligi dárigerlik-sanıtarlyq birlestiginiń Ortalyq klınıkalyq aýrýhanasyna 27 tamyz kúni tańerteńgi ýaqytta jetkizilgen bolatyn. Kóp uzamaı táýelsiz BAQ Islam Kárimovtyń qaıtys bolǵandyǵyn jarysa jazdy. Artynsha prezıdenttiń kishi qyzy Lola Kárimova eldi sabyr men otbasynyń jekeligin saqtaýǵa shaqyryp, ákesiniń aýyr halde ekenin habarlady.
Osylaısha Ózbekstan Respýblıkasynyń 1 qyrkúıek Táýelsizdik kúni qarsańynda elde sabyr-sabyr boldy degenimen, bul eldiń úkimeti ataýly kúndi tynysh ótkizýge baryn saldy. Táýelsizdik kúni ótken soń, ekinshi qyrkúıek kúni Ózbekstan Úkimeti eldiń tuńǵysh prezıdenti ómirden ozǵanyn qaıǵyra jetkizdi. Osy kezde qyzy Lola Kárimova da ınstagarm paraqshasynda «Ol bizdi tastap ketti...» dep jazdy.
Bul bozala tań ózbek eli úshin aýyr bolaǵyn anyq. Olaı deıtinimiz, Táýelsiz Ózbekstandy shırek ǵasyrdan astam bılegen Islam Kárimovsyz eldiń endigi tirshiligi men saıası hal-ahýaly qandaı bolary ázirge beımálim.
Saıasattanýshylar óz bıligine kelýi múmkin degen úsh tarapty aıtyp, Ózbekstan bıligi prezıdenttiń týystaryna berilmeıtinin boljap ta úlgerdi.
Osy oraı da biz de Ózbekstannan jyraq júrgen osy ulttyń ókiderinen eldiń endigi jaǵdaıy týraly oılaryn surap bilýge tyrystyq.
Anvar, qurylysshy:
-Men Qazaqstanda júrgenime 3-4 jyl boldy. Jylda jaz-kúz mezgilderinde osynda jumys istep aqsha tabamyn. Qyz-kóktemde otbasymnyń qasynda bolamyn. Ózbekstan saıası jabyq memleket der edim. Solaı bolǵanymen, bizdiń prezıdent elimizdi damytýǵa, ıslam dini men ózbek tilin kóterýge bar kúsh-jigerin saldy. Búginnen bastap Ózbekstan Kárimovsiz degenge asa qorqynyshpen qaraımyn. Endi bıikke talas kúsheıip, eldiń jaǵdaıy ýshyqpasa degen jalǵyz tilegim bar. Áıtpese marqum prezıdenttiń artynan jaman sóz aıtatyndaı ol eli úshin jaman áreket jasaǵan emes.
Shýhrat, satýshy:
-Osy bılikte uzaq otyratyn, qartaısa da taǵyn bermeıtin basshylar Orta Azıada ǵana bar shyǵar. Islam Kárimov sondaı el taǵyn uzaq bılegen basshylardyń biri de biregeıi. «Ólmektiń artynan ólmek joq», ózge elde nanymyzdy taýyp jep júrsek te, elimiz úshin alańdaımyz. Qart kisiniń sońǵy ýaqytqa deıin kelesi basshyǵa oryn bosatpaýy sonsha jyl bılegen elin endi dúrbeleńge túsire me dep qorqamyn. Biraq tynyshtyq bolýyn tileımin.
Zılola, aspaz:
-Qart kisi ǵoı, qaza qaıyrly bolsyn deımin. Biz birdeńe degenimen bılik máselesin zań men bıliktegi kisilerdiń ózderi sheshedi. Bizdiń qolymyzdan elimizdiń bereke-birligin tileý ǵana keledi. Kárimov uzaq jyldar Ózbekstannyń bolashaǵy úshin jaqsyly-jamandy jumystar atqardy. Ony tarıhta tuńǵysh prezıdent bolyp qalatynyn, shırek ǵasyrlyq eńbegin joqqa shyǵara almaımyz.
Nodır, aıaq kıim jóndeýshi:
-Islam Kárimovtyń qaıtys bolýyna baılanysty elime qaıǵyryp kóńil aıtamyn. Jyraqta júrsem de júregim elimmen birge. Alaıda eldiń bolashaǵy úshin alańdaýǵa esh negiz joq dep sabyrǵa shaqyrǵym keledi. Tuńǵysh prezıdentimiz bektiken zań bar, talap bar. Zań boıynsha bılikke kim kelýi kerek bolsa sol keledi. Bılik pen zańdarda ózgeris bolsa da, el ishi sol baıaǵysha qaz-qalpynda tirshilik keshe beretinine senem.
Aıta keteıik, 2013 jyl 1 sáýirdegi málimet boıynsha Qazaqstanda 520 myńǵa tarta ózbek turady. Ózbek dıasporasyna arnalǵan 81 mektep bar. Sondaı-aq, Qazaqstan halyqtary assambleıasynyń quramynda ózbekterdiń ulttyq mádenı ortalyǵy jumys isteıdi.
Esterińizge salsaq, Ózbekstan Respýblıkasynyń tuńǵysh prezıdenti Islam Kárimov 78 jasynda qaıtys bolyp, búgin Samarqanǵa jerlendi.
Al Ózbekstan Konstıtýsıasynyń 96 babyna sáıkes, Senat tóraǵasy Nıgmatýlla Iýldashev Ózbekstan prezıdenti mindetin ýaqytsha atqaratyn boldy. Endi aldaǵy úsh aıdyń ishinde Ózbekstan prezıdentin saılaý ótkizilýi tıis.
Indıra Qýat
