Búgin Nur-Múbarak ýnıversıtetinde «Ekstremızmniń aldyn alý salasyndaǵy mamandardy qaıta daıarlaý ınstıtýty» ashyldy, - dep habarlaıdy Qamshy.kz muslim.kz – ke silteme jasap .
Beıresmı derekter boıynsha qazir elimizde 16 myńǵa jýyq adam jat aǵym jeteginde. Endi búginnen bastap el arasyndaǵy ekstremıstik toptar men jat aǵymdarǵa qarsy kúresýshi mamandardy daıarlaý máselesi myqtap qolǵa alyna bastady.
Nur-Múbarak Egıpet ıslam mádenıeti ýnıversıtetindegi «Ekstremızmniń aldyn alý salasyndaǵy mamandardy qaıta daıarlaý ınstıtýtynyń» ashylý saltanatynda QMDB tóraǵasy, Bas múftı Erjan qajy Malǵajyuly: «Búginde meshitke keletin jamaǵattyń 85-90 paıyzy jastar. Al jalpy elimizdegi rýhanı izdeniske túsken jandar ǵalamtor arqyly jat aǵymdardyń ýaǵyz-nasıhatyna ılanyp jatady. Jat aǵym jetegindegilermen jumys jasaý úshin osyndaı top kerek edi. Sebebi ımamdardyń jalpy bilimi bolsa da, dál teris dinı toptardyń alǵan baǵytyna qarsy kúres máselesi bólek ádisti talap etpek. Sondyqtan, biz osy jaǵdaılardy eskere otyryp, aldaǵy 1-2 jylda 200-300-ge deıin mamandarymyzdy qaıta daıarlaý kýrsynda bilimderin pysyqtaımyz degen úmittemiz»,-dep aldaǵy josparlarǵa toqtalyp ótti.
«Bizdiń ýnıversıtet shákirt tárbıelep qana qoımaı, el ishindegi dinı máseleler men túıtkildermen de kúresýge daıyn. Sebebi bul barshamyzǵa ortaq múdde. Sondyqtan, men Mysyrda eki el arasyndaǵy kelisimderge saı birshama laýazymdy azamattarmen jolyqqan edim. EAR Ýaqyftar mınıstri Mýhammad Juma myrzanyń sizderge arnaıy sálemin joldaımyn. Bolashaqta bul jańa ınstıtýtqa ál-Azhar ýnıversıtetinen osy salaǵa mamandanǵan arnaıy 2 profesor keletinin aıtqym keledi»,-dedi Nur-Múbarak ýnıversıtetiniń rektory, profesor Jýda Basúnı.
Bul bastama 2016 jyldyń 10 maýysynda QR Prezıdenti N.Á.Nazarbaevtyń tóraǵalyǵymen QR Qaýipsizdik Keńesi otyrysynda memlekettik organdarǵa júktelgen birqatar tapsyrmalarǵa sáıkes júzege asyp otyr. Elbasy nusqaýyna saı QR UQK Tóraǵasynyń birinshi orynbasary S.Ábishtiń tóraǵalyǵymen Jumys toby qurylǵan bolatyn. Atalǵan Jumys toby QR MSM men QR BǴM-ne jańa ınstıtýtty Nur-Múbarak EIM ýnıversıteti janynan ashýǵa tapsyrma júktegen-di. Sebebi bul ýnıversıtet bilikti mamandar men ǵalymdardyń ortalyǵyna aınalǵandyqtan olar ıslam, din tóńireginde kez-kelgen saýalǵa jaýap bere alady. Bir ǵana Mysyrdyń ál-Azhar ýnıversıtetinen 14 ǵylym doktory qyzmet etetinin de aıta keteıik.
Al qazir elimizde jat aǵymdar jeteginde qansha jerlesterimiz júr degen saýalǵa QR MSM Din ister komıtetinen Balǵabek Myrzaev: «beıresmı derekter boıynsha 15-16 myńdaı adam. Onyń ishinde takfırıster, jıhadıster dep túrli aǵymdarǵa bólinip jatady. Al Sırıaǵa 500-ge jýyq adam ketken. Sondyqtan biz osy máselelerdiń barlyǵyn zerttep, taldap, olardyń teris baǵytqa ketýine ne sebep ekendigin jan-jaqty saraptaýdamyz. Qazirdiń ózinde «Aq-nıet» ońaltý ortalyǵy jat aǵym qurbandarymen jumys jasaýda.
«Bul ulttyq problema. Sebebi qanshama qarakózderimiz temir torǵa toǵytylyp, taǵdyrlary talqandalyp jatyr. Endi osy olqylyqtyń ornyn toltyryp, budan keıin ózgelerdiń jat aǵym qurbany bolmaýy úshin jan-jaqty eńbek etýimiz mańyzdy»,- dedi Nur-Múbarak ýnıversıtetiniń prorektory, profesor Shamshádın Kerim myrza.
Jańadan ashylǵan ınstıtýt dırektory bolyp Nur-Múbarak ýnıversıtetiniń oqytýshysy, PhD doktor Qaırat Qurmanbaev taǵaıyndaldy. Elimizdiń ár aımaǵynan kelgen 20 ımamǵa ınstıtýt mamandary dáristerin bastap ketti.
