OQO Túlkibas aýdanynda alma baý sharýashylyǵyn damytý maqsatynda oblystyq aýyl sharýashylyǵy basqarmasy, aýdan qala ákimderiniń orynbasarlary, baý sharýashylyǵymen aınalysýshy baǵbanshylardyń qatysýymen semınar-keńes bolyp ótti, dep habarlaıdy Qamshy.kz QazAqparatqa silteme jasap. 

Jıyndy oblystyq aýyl sharýashylyǵy basqarmasynyń basshysy S.Turbekov ashyp, óńirdiń óz erekshelikterin eskere otyryp, bir salany damytý, tájirıbe almasý, kórý, úırený maqsatynda ár aýdanda semınarlar ótkizilip jatqanyn málim etti, dep habarlady Túlkibas aýdany ákiminiń baspasóz qyzmeti.

Semınarǵa qatysýshylar aldymen, Mıchýrın aýyldyq okrýgine qarasty «Móldir» jaýapkershiligi shekteýli seriktestiginiń qarqyndy baǵymen jáne tálimbaǵymen tanysty. Túrkıanyń «Iaýla Fılıs» kompanıasymen birlesý nátıjesinde qolǵa alynyp, egilgen 110 gektarlyq jer alqabynda alma jemisi ósiriledi. 

Sonymen qatar, jumysshy top qarqyndy baý ósirýmen aınalysatyn «Kóktal», «Kentaý», «Túlkibas transservıs» JSHS-nde bolyp, tynys-tirshiligimen tanysty. 

Sharýashylyqtar baq ósirýde aldyńǵy qatarly elderdiń, onyń ishinde Túrkıa, Polsha memleketteriniń sońǵy úlgidegi ozyq tájirıbelerin paıdalanady. Bul baýlarda negizinen tamshylatyp sýǵarý tehnologıasy qoldanylady. Barlyq qajetti baý-baqsha tehnıkasy bolǵan jaǵdaıda, sharýashylyq qyzmetkerleriniń eńbegi aıtarlyqtaı jeńildetiledi, agrotehnıkalyq sharalardy júrgizýge yńǵaıly bolady. 

Semınarda sharýashylyq basshylary ózderiniń tájirıbelerimen bólisip, ózekti máseleler jaıyn talqylady. Jıyn sońy pikir almasýlarmen jalǵasyp, alma baýdy damytý boıynsha atqarylyp jatqan jumystar men kezdesetin kedergiler jaıly aıtyldy.

Jalpy Túlkibas aýdany taýly aımaqta ornalasqan. Aýa raıy qońyr salqyn, alma-baý jemis aǵashtaryn ósirýge óte qolaıly aımaq bolyp esepteledi. Búgingi tańda aýdandaǵy barlyq jemis aǵashtarynyń kólemi 3115 gektardy qurap otyr. 

2020 jylǵa merzimde deıin aýdan kóleminde alma baý kólemi 3600 gektarǵa jetkizip, onyń ishinde aýdanda qarqyndy baýlardy ósirý damytylyp, ónim kólemin ulǵaıtý josparlanýda. Aldaǵy merzimde almany Túlkibas aýdanynyń brendine aınaldyrý jolynda jumystar atqarylatyn bolady.