Búgin Astana qalasy máslıhatynyń kezekti sesıasy ótip, oǵan elorda ákiminiń orynbasary Qosman Aıtmuhametov qatysty, dep habarlaıdy Qamshy.kz Astana ákimdiginiń baspasóz qyzmetine -ke silteme jasap.
Depýtattar kún tártibine shyǵarylǵan 13 máseleni qarady. Otyrys barysynda talqylanǵan basty másele - avtomobıl joldaryn damytý jáne kútip ustaý boldy.
Astana qalasy ákiminiń orynbasary Qosman Aıtmuhametovtyń aıtýynsha, búginde tómende atalǵan ýchaskelerde kólik quraldary keptelip qalady. Olar: Turan dańǵyly men Qorǵaljyn tasjolynyń qıylysy, Turan dańǵylynyń Kereı men Jánibek handar kóshesinen Syǵanaq kóshesine deıingi bóligi, Syǵanaq kóshesi, Orynbor kóshesi, (Qonaev kóshesinen Kereı men Jánibek handar kóshesine deıin), Saryarqa dańǵyly (Tulpar kópirinen Kenesary kóshesine deıin jáne Bógenbaı batyr dańǵylymen qıylysy),Ýálıhanov kóshesi men Abaı dańǵylynyń qıylysy.
«Áleýmettik shıelenisti joıý, áleýmettik nysandardy ınjenerlik jelilermen jáne barý joldarymen qamtamasyz etý maqsatynda birqatar kóshelerdi salý jumystary qolǵa alyndy. Sonyń ishinde Seıfýllın kóshesi men Tilendıev dańǵyly aýmaǵynda jalpy uzyndyǵy 5,3 km 4 kóshe, Qoshqarbaev kóshesi aýmaǵynda jalpy uzyndyǵy 9,1 km 7 kóshe paıda bolady. Syǵanaq kóshesiniń aýmaǵynda E11, E13 kósheler salynyp jatyr. Sondaı-aq, bıyl «Zelenyı kvartal» TK ınjenerlik jeliler tartý jáne kósheler salý jumystary bastaldy»,- dedi Q. Aıtmuhametov.
Onyń aıtýynsha, qalanyń kólik jelisine túsetin júktemeni azaıtý úshin Kishi aınalma joldyń qurylysyn jalǵastyrý kerek. Onyń jalpy uzyndyǵy 35,0 km quraıdy. 2008 jyldan beri 22,8 km, 14 jolaıyryqtyń 9-y, kópirler men jol ótpeleri salynǵan.
«Kishi aınalma jolmen táýligine 90 myńnan astam kólik júredi, joba iske qosylǵan kezde kem degende 20 myń kólik qala ortalyǵyn aınalyp ótetin bolady», - dedi ol.
