Qytaıdaǵy qandastarymyzǵa vıza 3 jylǵa beriletin bolady. Bul týraly búgin QR Syrtqy ister mınıstrliginiń Konsýldyq qyzmet departamenti dırektorynyń orynbasary Kerim Qojamberdıev málim etti, - dep habarlaıdy Qamshy.kz QazAqparatqa silteme jasap.

«Vıza máselesine toqtalar bolsam, jyl basynda Kóshi-qon zańyna ózgerister engizilgen kezde bul másele kóterildi. Iá, bizde qıynshylyqtar bar. Úrimji qalasynda da qıynshylyqtar oryn alýda. Sebebi, ondaǵy konsýldyqqa vıza ashtyrý úshin kúnine 300-deı adam keledi. Vıza ashtyratyndardyń 95 paıyzy - qazaqtar. Búgingi tańda Qazaqstan tarabynan vıza eshqandaı shaqyrýsyz jáne konsýldyq alymsyz tegin  1  jylǵa beriledi. Qazaqstanǵa kelgende de eshqandaı shekteý bolmaıdy. 1 jyldyq vızasy bar adam qalaǵanynsha júrip-tura alady»,  - dedi ol.

Onyń aıtýynsha, Úrimjidegi konsýldyq kúndelikti keletin adamdarǵa tolyq qyzmet kórsetýge shamasy jetispeıdi. Al olardyń shtatyn ulǵaıtý úshin Qytaı tarabymen arnaıy kelisimge kelý qajet. Óıtkeni, qytaı tarabynyń elimizdegi elshiliginde qansha qyzmetker bolsa, bizdiń eldiń de sol jaqtaǵy dıplomatıalyq ókildiginde sonsha qyzmetkeri bolýy tıis.

«Endi Úrimjidegi kezekti azaıtý úshin biz jańa ereje qabyldaǵaly otyrmyz. Jyldyń ortasynda qabyldaıyq dep edik, bir zańdaǵy ózgeristerge baılanysty jyl sońyna qalyp otyr. Jańa erejege sáıkes birinshi ret Qazaqstanǵa kelemin degen oralmandarǵa nemese qazaq dıasporasyna 1 jyldyq,  al ekinshi ret keletin bolsa 3 jylǵa vıza beriledi. Úsh jylǵa beriletin vıza Úrimjidegi kezekti azaıtady dep oılaımyz», - dedi K.Qojamberdıev.

Sonymen qatar ol Qazaqstanǵa bilim alýǵa kelgen jastardyń 1 jyldyq vıza   merzimi aıaqtalsa, Qytaıǵa barmastan osy jerden-aq uzartýǵa bolatyndyǵyn eskertti.