Fýtboldan Qazaqstan quramasynyń bas bapkeri Talǵat Baısýfınov 2018 jylǵy Álem chempıonaty týrnıriniń irikteý kezeńindegi Chernogorıa quramasyna qarsy kezdesýden keıin oıyn týraly óz pikirimen bólisip, jýrnalıserdiń saýaldaryna jaýap berdi, dep habarlaıdy Qamshy.kz Qazaqstan fýtbol federasıasynyń baspasóz qyzmetine silteme jasap.
«Birinshi taımnan keıin alańnyń ortasyna qaraı jáne shabýyl shebine jyldam pastyń jetispegenin baıqadyq. Muny sportshylarǵa aıttyq. Qaqpaǵa bir goldy ótkizip aldyq, alaıda bul jaǵdaıdy túzetýge bolady dep eseptedik. Kezdesýdiń ekinshi kezeńinde ne bolǵanyn aıta almaımyn. Oıyndy qarap, ár sátti jiti qarap, tıisti sharalardy qabyldaýymyz kerek. Bizge sergektik, jınaqylyq jetispegeni kórinip turdy.
- Oıynnyń sátsiz ótý sebepteriniń biri alań bolýy múmkin be?
- Chernogorıa quramasy óz alańynda oınady, bul qarsylas komanda úshin, árıne, úlken qoldaý. Úıdegi alań biz úshin de basymdyq beredi. Degenmen, bar kináni alańnyń sapasyna artyp qoıý durys emes. Endi kelesi oıyndarǵa daıyndalatyn bolamyz.
- Naǵyz jankúıerler oıynshylardy sabyrǵa shaqyryp, kelesi oıynǵa durys baǵyt beretinińizge úmittenýde. Moıymaı, synnan ótetinderińizge sengimiz keledi...
- Tilegińizge rahmet, alaıda meniń qansha ýaqyt jumys isteıtinimdi jumys berýshim biledi. Ár oıyn aldynda oıynshylarǵa baǵyt kórsetip, keńes beremiz, olar alańǵa shyǵyp, jeńis úshin kúresedi. Ókinishke qaraı, búgingi oıynda oń nátıjege qol jetkize almadyq. Bul úshin kináni óz moınyma alamyn. Eki kúnnen keıin óz alańymyzda Rýmynıaǵa qarsy oınaımyz. Bul oıynǵa degen daıyndyqty bastap kettik.
