QazUÝ-dyń sportshy stýdentteriniń elimizde ǵana emes sonymen qatar halyqaralyq arenada baǵyndyryp júrgen bıik belesteri ýnıversıtet jastarynyń asqan daryndylyqtary men sheberlikteriniń aıqyn kórsetkishi. Qazaq kúresinen ótken İİİ álem chempıonatynda aǵaıyndy Ǵusman men Ǵumar Qyrǵyzbaevtar 60 jáne 70 kelige deıingi salmaq dárejesinde 2 altyn medalǵa ıe boldy- dep habarlaıdy Qamshy.kz .
Aǵaıyndylardyń úlkeni Ǵusman qorytyndy beldesýde Ózbekstan balýanyn tize búktirdi. «Biz Ǵumar ekeýmiz jarys bastalmaı turyp kim kóbirek taza jeńiske jetedi dep bástesken edik. Men jeńdim», – dedi Ǵusman estelikterimen bólisip.
«Qorytyndy aıqasta Qytaıdan kelgen sportshyny jeńdim. Chempıonatqa kil myqtylar jınalǵan, barlyq qarsylastar jaqsy daıyndyqpen kelgen. Bárinen de Monǵolıadan kelgen sporshymen beldesken qıyndaý boldy. Ol deneniń joǵary bóligin qarmap ustady, al meniń aılam onyń qýlyǵyn júzege asyrmady», – deıdi Ǵumar.
Oqý men jattyǵýdy tabysty qatar alyp júrgen aǵaıyndy Qyrǵyzbaevtar zań fakúltetiniń birinshi kýrs stýdentteri. «QazUÝ eń úzdik ýnıversıtet. Munda stýdentterdiń belsendi ómiri úshin barlyq qolaıly jaǵdaılar jasalǵan. Oqytýshylar da barlyq bastamalarymyzǵa únemi qoldaý kórsetip júredi», – deıdi palýandar.
«Jigitter halyqaralyq dárejedegi sport sheberleri. Qarsylastar bizdiń sportshylarmen beldesýge erekshe daıyndalǵan. Halyqaralyq jarystarǵa qazaqstandyq balýandardyń qatysýy bizdiń ulttyq sport túrleri men sporttyq dástúrlerimizge berilgen qurmet dep bilemin. Ǵusman men Ǵumar elimizdi jáne ózderi oqıtyn ýnıversıtettiń ataǵyn asqaqtatyp júrgen palýandar», – dep QazUÝ jattyqtyrýshysy Faızýlla Qoıshymanov maqtanyshpen atap ótti.
Palýandar qazaq kúresinen ǵana emes, sonymen qatar dzúdodan da respýblıkalyq jáne halyqaralyq jarystardyń birneshe dúrkin chempıondary. Ǵusman men Ǵumar osy baǵyttarynan taımaı, 2020 jyly Tokıoda ótetin Olımpıada oıyndarynda altyn alýǵa bekinip otyr.
Chempıondardyń aıtýynsha bosańsýǵa bolmaıdy. Aldaǵy ýaqytta aǵaıyndy palýandar qazaq kúresinen ótetin IV halyqaralyq chempıonatqa qatysýdy josparlap otyr. «Biz «Eýrazıa barysy» ataǵyna baq synaýǵa daıynbyz», – dedi Ǵumar Qyrǵyzbaev.
Qytaı Halyq Respýblıkasynda qazaq kúresinen ótken İİİ álem chempıonatyna 28 elden 200-den asa sportshy qatysty. Qazaqstan komandasynan bes salmaq dárejesi boıynsha alty sportshy baqtaryn synady. Nátıjesinde bizdiń sportshylar 5 altyn medalǵa ıe boldy. Onyń ekeýin QazUÝ stýdentteri qanjyǵalaryna baılady.
Ál-Farabı atyndaǵy Qazaq ulttyq ýnıversıtetiniń ujymy Ǵusman men Ǵumardy álem chempıonatynda jetken jetistikterimen quttyqtaıdy. Biz Sizdermen jáne Sizder baǵyndyrǵan bıik belestermen maqtanamyz!
Sizderge zor densaýlyq pen jańa jeńister tileımiz!
Aıkerim KAMALDINOVA
