Tanymal kompozıtor Erkesh Shákeev óziniń qaıtys bolǵan uly Safarǵa arnalǵan «Aspanda jolyǵarmyz..» atty fılmin aıaqtady, - dep habarlaıdy Qamshy.kz QazAqparatqa silteme jasap.
«Buny (fılmdi - red.) Safardyń dostarymen, óz otbasymmen, jaqyndaryn jaqsy kóretin barsha jandarmen jáne ómirden ótkenderdi eske alatyn adamdarmen bólisemin. Ómirde eshqashan jany jaısań jandar jaıly, sonyń ishinde tula boıy tuńǵyshym, súıikti ulym jaıly aıtýdan, oılaýdan jalyqpaımyn...», - dep jazdy Erkesh Shákeev óziniń Facebook-tegi paraqshasynda.
Sondaı-aq, avtor postynda Gennadıı Golvkın men Kell Brýktyń kezdesýine barǵanyn aıtady. Oǵan shaqyrtýdy bergen jáne barýǵa kóndirgen Edýard Kımge alǵysyn bildire kele avtor Gena, Serik Eleýov jáne Bahtıar Artaevtar ulymen zor yqylaspen tanysqan sáti túsirilgen vıdeony taýyp alǵanyn, ony fılmge qosqanyn aıtady. Sóz arasynda Golovkınge sheksiz alǵysyn jetkizedi.
Kompozıtor Almatyda qyrkúıektiń basynda ótken Safardy eske alýǵa arnalǵan keshti uıymdastyrýshylarǵa da alǵysyn bildiredi.
«...Biz ulymyzdy sońǵy saparǵa shyǵaryp salyp jatqan kúni maǵan Baýyrjan Shúkenov kelip, Safardyń týǵan kúnin Arman kınoteatrynda ótkizýdi usyndy. Usynysty kınoteatr aksıoneri ári meniń dosym Erpan Salımov ta qoldady. Keshti eriktiler men onyń jaqyn dostaryna arnap ótkizýdi jón dep sheshtik. Ol jaıly Feısbýkte habarladyq.
Keshte oǵan basty sebepker adam jaıly sóz aıtylatyny aıtpasa da túsinikti. Safardyń dostary: Dan Kamchatskıı, Dmıtrıı Leıhmann, Rústem Tóreǵalıev, Narǵyz Shúkenova, Kırıll, Dıastar bul iste jáne ulym týraly fılm túsirýde kóp kúshin jáne ýaqyttaryn sarp etti. Dosym Edýard Kım tehnıka men prodýsserlik topty uıymdastyrdy. Olar kóptegen turǵyndardyń ótinishi boıynsha ınternette onlaın-translásıa jasady.
Otbasymyzdyń dostary Janel Bekshenova, Oksana Baımenova, Sholpan Keremet, Qaırat Majıbaevtar shaqyrylǵan jastarǵa dastarhan jaıdy. Vıktor Homenkov óz tobymen kelip, jaz mýzykasyn sheber oryndap, áýezdi atmosfera qalyptastyrdy.
Odan bólek estrada juldyzdary Juldyz, Kental, Sıtora jáne Parvız Nazarovtar, Tolqyn Zabırova, Erık Tastambekovter keldi.
Dosymyz Dana Ormanbaeva aparatýra men tehnıkalyq qyzmetkerlerdi alyp keldi.
Amerıkadan júrek qalaýlarymen 5 dosy men mektepte sabaq bergen 3 ustazy ushyp keldi. Meniń otbasymnyń ótinishimen Vıktorıa Momynbaeva men Bolat Amansúgirov Arýjan Saınnyń jaqyndary úshin qaıyrymdylyq aksıasyn ótkizdi.
Safardyń dostary qonaqtardy kútip alyp jattty.
Baýyrlarym men qaryndastarym, osylaısha mahabbat pen qaıyrymdylyqqa negizdelgen qarapaıym rýhanı sharany ótkizdik.
Shyn júrekten syn saǵatta qoldaý bildirgenderińiz úshin alǵys aıtamyn. Men bárlerińizdi jaqsy kóremin jáne barlyqtaryńyzdyń berekeli kún keshýlerińiz úshin duǵa tileımin», - dep jazdy Erkesh Shákeev.
Eske sala keteıik, Safar Shákeevtiń joǵalyp ketkeni týraly shaǵym 16 shilde kúni polısıaǵa kelip tústi. Ony 110 polıseı, 60 erikti jáne birneshe súńgýir izdegen edi. İzdeý jumystaryna tikushaq ta jumyldyralǵan bolatyn. Alaıda, Safar Shákeevtiń denesi 28 shilde kúni Esentaı ózeninen tabyldy.
