Feısbýk áleýmettik jelisi búginde búkil BAQ jumysyn ózi atqarýda. Qarapaıym halyq feısbýkte otyryp muń shaǵyp, aryzdanyp, kókeıde júrgen suraqtyń jaýabyn alyp otyr. Atalmysh áleýmettik jeli, ásirese, qazaq tildi oqyrmannyń baǵyna aınalǵany jasyryn emes. Ǵalamtorda otyryp-aq jaqsylyq jasaýǵa bolatynynyń dáleli retinde úsh kún buryn sheteldik BAQ jarysyp jazǵan oqıǵany nazarlaryńyzǵa usynamyz.

31 jastaǵy Kolın Ross esimdi kanadalyq azamat feısbýkte jazǵan bir jazbasy arqyly bir adamnyń taǵdyryn ózgertti. Máseleniń mán-jaıy mynandaı: senbi kúni Kolın "Whitbie’s Fish & Chips " degen jerge kirip tamaqtanady. Ony tań qaldyrǵany - kafede bir adamnyń qyzmet jasaýy. Sóıtse, 70 jastaǵy shotlandıalyq Djon MakMıllan ózi ıesi, ózi daıashy, ózi aspazshy eken.

Ross paltýs balyǵyn tapsyrys beredi. Balyqtyń dámin tatqan ol eriksiz tańdaı qaǵady. Daıashy túgil ózine aılyq tóleýge múmkindigi joq kafe ıesine qarap feısbýkte atalmysh kafe jaıly jazba jarıalaýǵa sheshim qabyldaıdy. Jazba jarıalanǵannan keıin seısenbi kúni 400 adam, sársenbi kúni 500 adam Ross aıtqan kafeni izdep keledi. Kolınniń feısbýktegi jazbasyn 8000 adam óz paraqshasynda bólisipti.

7 jyldyń ishinde osynshama kóp klıentke qyzmet jasaǵan Djon aǵynan jarylyp, mynandaı suhbat beripti. ""Whitbie’s Fish & Chips" kafesin ashqanda ol adamdardyń kóńilinen shyqsa ǵoı degen armanym bolatyn. Búgin sol armanym oryndaldy" deıdi.

Bir adamnyń tańdyryn ózgertken Kolın Rosstyń feısbýktegi jazbasy: "Óz-ózine aılyq tóleı almaǵan 70 jastaǵy kafe ıesiniń jaǵdaıy meni qatty tolqytty. Men aınalamdaǵy adamdardyń, ásirese, myna eńbekqor adamnyń jaǵdaıy jaqsarǵanyn qalaımyn. Sol sebepti Letbrıdj qalasynyń árbir turǵynyn "Whitbie’s Fish & Chips" kafesine kelip, qonaq bolýǵa úndeý tastaımyn. Djon MakMıllan baqytty bolýǵa laıyqty".

Jazıra Baıdaly