Qanat Islamǵa arnaý
Eliń aman júrsiń be, basyń aman,
Janyń jaısań jigitsiń jasymaǵan.
Baqyr basty ul tappaı, batyr tapqan,
Tekti jerdiń qyzy eken asyl anań!
Arda týǵan atadan ulanbysyń,
Ańyzbysyń Alashqa, uranbysyń!
Baýyryna Alataý basty búgin,
Altyn topshy Altaıdyń qyran qusyn.
Arystandaı aıbatty dara týǵan –
Aınalaıyn som bilek Qanatymnan!
Qarsylasyn qańbaqtaı domalatqan,
Judyryǵy temirden jaratylǵan.
Túk ósken be júrekke, búr ósken be,
(Jýasıdy ne myqty úni óshkende)
Súrinýge haqyń joq, jeńilýge,
Atameken tórinde kúreskende.
Azat kúnge jetkende, azat tańǵa,
Kim tózedi qorlyq pen mazaqtarǵa...
Qanaty bar Qazaqta arman barma,
Arman barma Qanatta Qazaq barda!!!
Ǵalym Qalıbekuly,
aqyn, Halyqaralyq «Alash»
Ádebı syılyǵynyń ıegeri.
