Túrik Prezıdenti Erdoǵan Stambulda «MÜSİAD EXPO» kórmesiniń ashylý rásimine qatysyp, kún tártibin baǵalady, dep habarlaıdy «Qamshy» portaly TRT-qazaq habaryna silteme jasap.

Rejep Taıyp Erdoǵan Halyqtardyń demokratıalyq partıasynyń (HDP) ótken apta tutqyndalǵan depýtattarynyń aldynda «arqamyzdy PKK/PID/IPG uıymdaryna súıedik» degen sózderin eske salyp, «Al bólshekteýshi terror uıymy kelip sizdi qutqarsyn» dedi.

Túrkıanyń bul depýtattarǵa Túrkıa Uly Ulttyq Májilisiniń (TUUM) esikterin ashyp, osynda saıasat jasaýǵa jaǵdaı jasaǵanyn atap aıtqan Erdoǵan «Biraq olar TUUM kirgen soń memleketti qorqytpaqshy boldy. ‘Sen meni jaýapqa tarta almaısyń’ dedi. Qolsuǵylmaý quqyńyz joıylǵan soń árıne sot organdary seni tergeıdi. Qolsuǵylmaý quqy joıylǵan soń sen de jaı azamat sıaqtysyn. Basqa partıa basshylary baryp túsiniktemesin berip, qaıtyp jumysyn jalǵastyrady. Siz de solaı jasaý kerek edińiz. Siz qorqytpaqshy boldyńyz, bizdiń arqamyzda PKK, PID, IPG bar dedińiz. Kelip qazir olar sizdi qutqarsyn» dedi.

Eýroodaqqa da narazylyq kórsetken Erdoǵan «Uıalmaı ‘Túrkıanyń Eýroodaq kelissóz kezeńine kóz júgirtý kerek’ deıdi. Keshiktińiz, tez arada kóz júgirtińiz. Kóz júgirtýmen shektelmeı naqty sheshimińizdi de qabyldańyz. ‘Túrkıa terror taqyrybynda sezimtal, abyroıly kúresin jalǵastyrady’ dep kóz júgirtemiz deseńiz, keshikpeńder. Óıtkeni biz terrormen kúresti sońyna deıin jalǵastyramyz» dedi.

Eýroodaq kelissózder toqtaǵan jaǵdaıda, Túrkıadaǵy 3 mıllıon bosqynnyń ózderine jiberiletinine alańdaǵanyn atap kórsetken prezıdent «Bizge adam quqyqtary men demokratıa jaıly sabaq bermekshi bolǵan batystyq ujdan jyldardan beri Jerorta teńizi men Egeı teńizinde joǵalyp ketken on myńdaǵan adam úshin kóz jasyn tókken be? Eýropaǵa bara alǵan bosqyndarǵa ártúrli jábirleýdi jasaǵandar biz jaıly áńgime bolǵan kezde arystandaı bolady. Uıalmaı qoldarynan aqqan qanǵa qaramaı, bizge «nasıst» deıdi. Naǵyz nasıst ózderińiz» dedi.