"...Sol kúni keshke Jambyl (Jabaev) qarttyń úıine bardyq. Jambyldyń úıine kirip, bir bólmesinde jantaıyp jatqan judyryqtaı aqsaqalǵa sálem berdik... Jambyl meniń betime syǵyraıa qarady. Onyń synap otyrǵanyn baıqap, men de qabaǵymdy túıip, oǵan ejireıe qaldym. Sodan soń Jambyl Sábıtke (Muqanov) qaraı moınyn burdy da:
- Myna qyzyndy... túsi tym sýyq eken, batyr bolsa bolar! - dedi.
Sábıt oǵan qaryq bolyp kúlip jatyr. Mende ún joq. Jambyl kúlmesten maǵan qaıta qarady.
- Batyr bolsań sen Ótegen men Suranshydan kúshtimisiń, sony aıtshy, - dedi.
Men oılanbastan jaýap berdim.
- Ótegen qaptap kele jatqan órt sıaqty da, Suranshy sarqyrap aqqan sý sıaqty batyr bolatyn. Dúnıede ot pen sýdan kúshti joq. Men ol ekeýiniń eshqaısysyna da par kele almaımyn. Men - ottyń ushqyny, sýdyń tamshysy ǵanamyn, Jáke, - dedim.
Jákeńniń óleńinde ózi aı̆tatyn «borǵa malǵan» saqaly shoshań-shoshań etip qaldy. Ol atamyzdyń kúlgeni eken. Endi kózi shyradaı̆ jaı̆nap, jyly ushqyn shashyp, taǵy da Sábıtke qarady.
- Áı̆, Balýan, mynaýyńnyń túrinde ǵana emes, tilinde de birdeńe bar eken, qonyńdar, - dedi. Jákeń Sábıtti mol denesine baı̆lanysty ylǵı osylaı̆, Balýan Sholaq dep ataı̆dy eken. Jambyl «Balýan Sholaq!» dese, Sábıt: «Aý, táte»dep jaýap beredi.
Biz jaı̆ǵasa bastadyq. Syrt kıimderimizdi sheshinip jatqanymyzda shaldyń saqaly, sý betine sekirgen aq qaı̆randaı̆* bolyp, bir jarq ete qalǵan edi. Endi jaı̆lanyp otyra bergenimizde aı̆ múı̆izdi aq qoshqardyń ústine salt mingen bireý, shabýylǵa shyǵatyn kavalerıseı̆ ekpindetip kelip, tabaldyryq aldyna toqtaı̆ qaldy da:
- Áýmın, - dep alaqanyn jaı̆dy. Maldas quryp otyrǵan Jókeń moı̆nyn burdy da:
- Áı̆, Balýan Sholaq, óziń jasaýshy ma ediń, álde batyryń berýshi me edi batany? - dedi.
- Oı̆baı̆, táte, ózińiz jasańyz, - dedi Sábıt.
Jambyl alaqanyn jaı̆dy da:
- Batyrdyń joly bolsyn!
Samsaǵan qoly bolsyn!
Túsi de sýyq eken,
İsi de doly bolsyn, Allaákpar! - dep betin sıpady..."
B.Momyshuly. [Aqıqat pen ańyz].
Materıal Islam.kz saıtynan alyndy
