Keshe №2 Atyraý qalalyq sotynda qoǵam belsendileri Maks Boqaev pen Talǵat Aıanov sońǵy sózderin aıtty. Taraptar jaryssózinen keıin sottalýshylardyń sońǵy sózin tyńdaǵan sýdıa G.Dáýleshova úkim shyǵarý úshin keńesý bólmesine ketti.

 «Jer kodeksi túbegeıli ózgertilsin. Talǵat ekeýmizdiń aıtarymyz bar, bul bizdiń sońǵy sózimiz emes. Qazaqstannyń damýyna óz úlesimizdi qosa alatynymyzǵa senimdimin. Elimizdiń gúldenýine barlyq múmkinshilikterdiń bar ekenine senemin», - dedi M.Boqaev sońǵy sózinde.

Al Talǵat Aıanovtyń sózi ádettegideı qysqa da nusqa boldy. Ol sońǵy sózinde óziniń kináli emestigin aıtty.

Óz kezeginde, sýdıa G.Dáýleshova eki aıǵa jýyq ýaqytqa sozylǵan basty sot prosesin qorytyp, úkim shyǵarý úshin keńesý bólmesine ketti.

Eske sala ketsek, keshegi sotta taraptar jaryssózi ótip, onyń barysynda memlekettik aıyptaýshy Marat Habıbýllın sottan M.Boqaev pen T.Aıanovty 8 jylǵa bas bostandyǵynan aıyrýdy surady. Prokýror sot prosesi barysynda sottalýshylardan, kóptegen kýágerler men sarapshylardan jaýap alynǵanyn, is boıynsha barlyq dálelder men materıaldardyń, zattaı aıǵaqtardyń zerttelip, ótinishterdiń qaralǵanyn aıtty. Ol Boqaev pen Aıanovqa taǵylǵan aıyptardyń tolyq dáleldengenin jetkizdi. Sottalýshylarǵa QR Qylmystyq kodeksiniń úsh baby: 174 baptyń 2 tarmaǵy, ıaǵnı, áleýmettik jáne ulttyq alaýyzdyq týǵyzýǵa baǵyttalǵan qasaqana is-áreketter jasaý, azamattardyń ulttyq namysy men qadir qasıetine til tıgizý; 274 baptyń 4 tarmaǵy, ıaǵnı, qoǵamdyq tártipti buzýǵa qaýip tóndiretin kópe-kórineý jalǵan aqparat taratý; 400 bap, ıaǵnı, zańsyz sherýlerdi uıymdastyrý, ótkizý jáne oǵan qatysý boıynsha aıyptar taǵylyp otyr.