Ol – bolmysynan, tabıǵatynan aqyn edi. Ol áldebireýler sekildi ómirde aqynnyń obrazyn jasaǵan joq. Ómirde basy «noqtaǵa syımaı» aqyn bolyp ómir súrdi. Ol basqasha ómir súre almas ta edi. 
Esenın tanymal aqynǵa aınalǵanda ony kórýdi, onymen tanysyp, jaqyn aralasýdy talaı jas aqyn, talaı oqyrman armandady. Esenınge eliktep, Esenınshe óleń jazǵylary keldi. Esenındeı ómirge erkelep, ómir súrgisi keldi. Biraq ómir eshkimdi erkeletken emes. Tipti týmysynan daryndy, erekshe jaratylys ıesi, erke, názik, sezimtal, sengish, ańǵal, tákappar Esenındi de. ...Amerıkalyq tanymal bıshi, ózinen on segiz jas úlken Aısedora Dýnkanǵa úılengenin bireýler jazǵyryp jatty. Biraq... ózin ózi qutqarý úshin, saqtaý úshin, taǵy da óleń jazýy úshin ol solaı etýge májbúr edi. Talantyna tusaý, shabytyna tejeý bolǵan aıar dushpandardan alys ketý úshin, biraz ýaqyt shetelge ketý úshin kedeı aqyn bıshige úılenýge tıis edi. Aısedora Dýnkan orys tilin óte nashar biletin, tipti oıyn jetkizip aıta almaıtyn, al Esenın aǵylshynsha múldem bilmeıtin. Ekeýi ymmen sóılesip, birin-biri áıteýir túsinetin. 
Aısedora talantty, taǵdyrly bıshi edi. Úlken uly men qyzy jolapatyna ushyraıdy. Olar mingen mashına kópirden Senaǵa qulap, mashınamen birge balalary sýǵa batyp, óledi. Aýyr qaıǵydan kópke deıin bıshi óz ózine kele almaıdy. 
Zamandastary: «Alǵash tanysqan sátte-aq ekeýi birin-biri burynnan biletin sekildi áser qaldyrdy. Erke, tentek Esenın Aısedoranyń tizesine basyn qoıyp jatty. Aısedora «altyn bas» dep onyń shashynan sıpap otyrdy» deıdi. 
Aısedora Dýnkan Esenınge turmysqa shyǵarda óziniń jasyn jasyryp, tipti pasporttaǵy ómirge kelgen jylyn ózgertedi. Esenın «Aısedorany ózinen toǵyz jas úlken» dep oılaıdy, al shyn máninde, áıeli ózinen on segiz jas úlken edi. 
Aısodoraǵa deıin Esenın Zınaıda Raıh esimde aktrısamen nekede boldy. Zınaıdadan eki balasy bar. Jýrnalıs, ári óziniń ádebı kómekshisi Galına Benıslavskaıamen Aısedora Dýnkanǵa úılengenshe birge turdy. Dýnkanmen ajyrasqannan keıin Galınaǵa qaıtyp keldi, biraq ekeýi úılengen joq. Esenın ómirden ótkennen keıin bir jyldan keıin Galına aqynnyń beıitiniń basynda ózin ózi atyp, óltiredi. 
Lev Tolstoıdyń nemeresi Sofá – Esenınniń sońǵy áıeli. Sofáǵa úılengennen keıin bir jyldan keıin Esenın ózine qoljumsap óledi. Biraq búginde minezdi aqynnyń ózine ózi qoljumsap ólmegenin, onyń ólimine NKVD-nyń qatysy bary jazylyp ta, aıtylyp ta jatyr.

Aıagúl Mantaı