Búgin Ońtústik Qazaqstan oblysynyń ákimi Janseıit Túımebaev Qazyǵurt aýdanyndaǵy «Jasyl jelek» memlekettik mekemesiniń jumysymen tanysyp, tuqymbaqtaǵy  kóshetterdi aralap kórdi.

Úsh ýchaskelik bólikten turatyn 60 gektar tálimbaqta búginde 3,5 mln. túpten astam aǵash kóshetteri baptalýda. Osyndaǵy jumystardyń jaıyn baıandaǵan oblystyq Tabıǵı resýrstar jáne tabıǵat paıdalanýdy retteý basqarmasynyń basshysy M.Otarshıev tuqymbaqta qylqan japyraqty, dekoratıvti, jemis aǵashtary men butalardyń 40-tan astam túri egilgenin jetkizdi. Sondaı-aq, ol tuqymbaqtaǵy ósirilip jatqan seppe jáne tikpe kóshetterge turaqty túrde kútip, baptaý jumystary júrgiziletinin jáne  suranysqa ıe kóshetterdiń túrlerimen tolyqtyrylyp otyratynyn aıtty. Máselen, bıyl mekeme tuqymbaǵynda 912 myń túp óskin jańadan otyrǵyzylǵan.

Basqarma basshysyn muqıat tyńdaǵan oblys ákimi osyndaǵy  qylqan japyraqty jáne dekoratıvti aǵashtardyń bıiktigi 2,5 metrden asatyn suryptaryn Shymkent qalasynyń ortalyǵyndaǵy 26 kóshege otyrǵyzýdy tapsyrdy.

«Ózderińiz bilesizder, halqy kóp  Shymkent qalasynda tıisinshe, avtokólikterdiń  sany da tyǵyz. Sondyqtan ekologıany saqtap, tabıǵı balansty retteý úshin Shymkentti jasyl qalaǵa aınaldyryp, atyna laıyqty etýimiz kerek. Shahardyń kórkine sán beretin túrli dekoratıvti aǵashtardyń sanyn kóbeıtý úshin osy tuqymbaqqa jańa kóshetterdi egý kerek. Shymkenttiń kógaldandyrý jumystaryna tıisti sala mamandary biraýyzdan jumyldyrýdy júkteımin»,-dedi ákim.

Shymkenttiń kógaldandyrý jumystaryna erekshe mán bergen aımaq basshysy bul máseleni jeke baqylaýyna alatynyn eskertip, aldaǵy ýaqytta qalada birneshe shaǵyn baqtar (skverler) salynatynyn jetkizdi.

Basqarma basshysynyń aıtýynsha, «Jasyl jelek» tuqymbaǵynan qalada otyrǵyzýǵa saı keletin shamamen 100 myń aǵash kóshetin alýǵa bolady.

Mekeme qurylǵan 11 jylda tuqymbaqtyń egindik bólimshelerinde 3-4 mln. dana aralyǵynda qylqan japyraqty, dekoratıvti, jemis aǵashtary men butalardyń 40-tan asa túri ósirilip, oblystaǵy memlekettik  mekemeler men halyqtyń suranysyn qanaǵattandyrǵan.

Osy kúni oblys ákimi Sharaphana aýyldyq okrýgindegi «Nurly jol» baǵdarlamasy boıynsha salynyp jatqan M.Ótemisuly atyndaǵy 300 oryndyq mekteptiń qurylysymen tanysty. Keler jylǵa ótpeli nysannyń sapasyn qadaǵalaǵan aımaq basshysy qurylys jumystaryn merziminde aıaqtap, onda qoldanylatyn qurylys zattary otandyq bolýyn aıtty.

http://adym.kz/