Búgin oblys ákimdiginde Ońtústik Qazaqstan oblysynyń ákimi Janseıit Túımebaevtyń tóraǵalyǵymen kúzgi maýsymda Shymkent qalasynda otyrǵyzylatyn aǵash kóshetteri boıynsha jıyn ótti. Otyrysqa Shymkent qalasynyń ákimi Ǵabıdýlla Ábdirahymov pen salaǵa qatysty jaýapty jetekshiler qatysty.

Jıynda qaladaǵy 4 aýdan ákimdigine qarasty saıabaqtar men gúlzarlarǵa, sonymen birge, eldi mekenderdi qosatyn jol boılary, mektepter men balabaqshalarǵa, aýrýhanalarǵa jáne İ sanatty ortalyq kóshelerge egiletin jasyl jelekterdiń josparyn baıandaǵan shahar basshysy Ǵ.Ábdirahymov atalǵan aýmaqtarǵa 77 myń túpten astam jasyl jelekti otyrǵyzý jumystary eki kezeńmen júretinin jetkizdi.

Qala ákiminiń aıtýynsha, kólemi 22,5 ga bolatyn saıabaqtar men gúlzarlarǵa 8 myń túpten astam qyrym qaraǵaıy men shynar, lıpa otyrǵyzylsa, Abaı, Ál-Farabı, Eńbekshi jáne Qarataý aýdandaryna qarasty aýmaqtarǵa 22 myń túpten astam qaraǵash otyrǵyzylmaq. Jumystardy «Shymkent jasyl qala» memlekettik mekemesi júrgizetin bolady.

Kúzdik kóshetterdi otyrǵyzý jumystary, sondaı-aq, Shymkenttegi ortalyq dańǵyldar men kóshelerge de júrgizilmek. Atap aıtqanda, qaladaǵy Temirlan tas joly, Arǵynbekov kóshesi, Qonaev dańǵyly, Báıdibek bı dańǵyly syndy 21 ortalyq kóshege 47 myń túpke jýyq jasyl jelek egiledi. Shahardyń sánine kórik beretin mundaǵy aǵashtardyń deni týıa (boz arsha), legýstrým, qaraǵash, qyrym qaraǵaıy, kashtan, terek, forzısıa, klen syndy aǵashtardyń kóshetterinen turady.

Oblys ortalyǵy – Shymkentti kógaldandyrý jumystary aıasyndaǵy málimetterge qanyqqan Janseıit Qanseıituly jasyl jelekterdiń óńir klımatyna saı bolýy kerektigine nazar aýdaryp, aptap ystyqta saıa bolatyn qylqanjapyraqty aǵashtardy kóptep egýdi tapsyrdy. Kóshetterdiń basym bóligin Qazyǵurt aýdanyndaǵy «Jasyl jelek» tuqymbaǵynan alýǵa nusqaý bergen aımaq basshysy ár aptadaǵy senbilik kezinde jospardaǵy kúzdik kóshetterdi otyrǵyzyp úlgerýdi tapsyrdy.

http://adym.kz/