Aýyl sharýashylyǵy salasynyń jetistikteri baıandalǵan merekege kelýshilerdi oblys ákimi Janseıit Túımebaev quttyqtap, bıylǵy jyldyń óńir sharýalaryna berekeli bolǵanyn atap ótip, sharýalarǵa qýanyshty habar retinde keler jylǵa 6 mlrd 47 mln teńge sýbsıdıa bólingenin jetkizdi. Oblys basshysy túrli aýyl sharýashylyq ónimderin óndirýden İ oryn alǵan ozat aýdan, qalalardy atap, arnaıy syılyq pen oblys ákiminiń sertıfıkattaryn tabystady. Máselen, astyq óndirýde Qazyǵurt aýdanyna eshkim teń kelmese, júgeri óndirýde Otyrar aýdany, maqsaryda Tólebı, ońtústiktiń brendi bolyp tabylatyn maqta boıynsha Maqtaral aýdany úzdik dep tanyldy. Al, baqsha ónimderin jınaý boıynsha shardaralyqtar kósh bastasa, kókóniste Saryaǵash, jemis-jıdekte Túlkibas, sút Arys qalasy, et óndirýde Ordabasy sharýalarynyń mereıi ústem boldy. «Sybaǵa» baǵdarlamasynyń oryndalýy jóninen túrkistandyqtar erlep, «Altyn Asyq» baǵdarlamasy sheńberinde Báıdibek ozyq shyqty. Al ozyq ınvestısıalyq jobalardy iske asyrýda Shymkent qalasy basym bolsa, aýyl sharýashylyǵy jármeńkesin uıymdastyrýda Saıram órlep, aýyl sharýashylyǵy salasynyń damýyna ǵylymı turǵydan úles qosýdan Maqtaraldyń bedeli bıik boldy. Aıta keteıik, oblysta maqtanyń 80 paıyzyn Maqtaral aýdany óndirip otyr. Árıne, ǵylym men eńbekti ushtastyrǵan sátte kez kelgen qamaldy baǵyndyrýǵa bolady. Maqta sharýashylyǵyndaǵy ǵylymı-zertteýlerdi damytý arqyly otandyq básekege qabiletti maqtanyń jańa sorttaryn shyǵarý, maqta óndirýdiń tıimdiligin, ınovasıalyq tehnologıalardy óndiriske endirýmen Maqtaral aýdanynda Qazaq maqta sharýashylyǵy ǵylymı-zertteý ınstıtýtynyń ǵalymdary aınalysyp, birqatar jetistikterge jetti.