Aqtóbede, 5 maýsym kúngi terakt oqıǵasy kezinde erekshe jumysymen kózge túsken polısıa qyzmetkerleri marapattaldy. Qandy oqıǵanyń basynda júrip, birneshe lańkesti quryqtaýǵa qatysqan Elek polısıa bólimshesiniń qyzmetkeri áriptesteriniń arasynda úzdik qyzmetker atandy. Bul týraly aktobenews.kz jazdy. Mindetin úzdik atqarǵan Aslan Esentaev  «Altyn adam» ataǵyn ıelendi.

«Sol kezde Elek bólimshesinde kezekte boldyq. Túski ýaqytta «Pallada» dúkenine qarýly shabýyl jasalǵany habarlandy. Sol kezde qala boıynsha júrgen barlyq polısıa qyzmetkerleri shaqyrylǵan bolatyn. Biz «Pallada» dúkenine barǵan kezimizde «Pantera» qarý jaraq dúkenine kómek surady. Ol jerge barǵanymyzda áriptesterimizdiń qyzmettik kóliginiń ashyq turǵanyn kórdik. Sol jerde biz oılanbastan atysqa qatysyp kettik. Jerde jatqan qylmyskerdiń qarýyn alyp, oǵan kisen salyp, ári qaraı atystyq. Qasymda Jaqsybaev pen Nuǵalıev esimdi eki serjant boldy. Nurǵalıev jaraqattanyp qalǵannan keıin Jaqsybaev ekeýmiz atysty jalǵastyrdyq. Sol kúni keshke Kirpishti aýdanynda da shabýyl boldy. Olar  «nıva» avtokóligin alyp ketti. Sol jerden qarý ustap jatqan qylmyskerdi kórdik. Atýyma  týra keldi,- deıdi Aslan Esentaev.

Aıta keter bolsaq, Bıyl 5 maýsymda Aqtóbede terakt bolǵan edi, onyń saldarynan ondaǵan adam qaza tapty. Qazaqstanda terrorlyq qaýiptiń sary deńgeıi, al Aqtóbede qyzyl deńgeıi engizildi.

«Biz munyń salafızm dástúrli emes dinı aǵymynyń zulymdyq áreketi ekenin bilemiz. Respýblıkadaǵy dinı senim bostandyǵyn qamtamasyz ete otyryp, biz sonymen qatar dinı urandarmen búrkenip, eldegi jaǵdaıdy shaıqaltqysy keletinderdiń barlyǵyna tabandy toıtarys berýimiz kerek», - degen edi memleket basshysy atalǵan jaǵdaıǵa baılanysty Qaýipsizdik keńesiniń barysynda.