Ońtústik Qazaqstan oblysy, Shardara aýdanynda balyq óndirisi órkendep, ónim shetelge eksporttalyp jatyr.

Búginde aýdanda balyq sharýashylyǵymen aınalysatyn eki kásiporyn jumysyn sátti júrgizip keledi.

Onyń biri  - «Hamıt» balyq óńdeý kompanıasy. Bul kásiporyn balyqtyń etin Grýzıa, Germanıa, Ýkraına Respýblıkalary men Reseı Federasıasyna jóneltýde. Balyq shabaǵyn kásiporyn syrttan tasymaldaıdy. Taýardy tereńdetip óńdeıtin zaýyt sońǵy úlgidegi qondyrǵylarmen jabdyqtalǵan. Óndiris orny 200 jergilikti turǵyndy jumyspen qamtyp otyr. Zaýyt jylyna 3 myń tonnaǵa deıin ónim óndirýge qaýqarly. Munda qos birdeı jeli jumys isteıdi. Aldymen, balyq súıeginen ajyratylady, sosyn súbe etten fıle jasalady. Tipti, qaldyǵynan un da shyǵarylady eken. Tıimdiligi sol, shıkizat qaldyqsyz óńdeledi. «Sapaly ónimge suranys ta joǵary», - deıdi seh basshysy. «Hamıt» selolyq tutynýshylar kooperatıvi jylyna óndirgen óniminiń 70 paıyzyn shetelge jóneltedi. Qazir zaýyt balyqtyń súıekten ajyratylǵan taza eti men qaqtalǵan túrine basymdyq bergen. Kásiporyn óz ónimin Eýroodaqqa kiretin memleketterdiń naryǵyna shyǵarýǵa arnaıy ruqsat alǵan elimizdegi 10 balyq óńdeýshi zaýyttyń biri. Zaýyt negizinen kókserke men alabuǵanyń taza etin eksporttaıdy. Qaqtalǵan qarakóz ben tabanǵa da suranys joǵary. Sondyqtan óndiris basshylyǵy balyq shabaǵyn Qaraǵandydan tasymaldap, ony qoldan ósirip jatyr. Sonyń arqasynda Reseı, Belarýs elderimen qatar, Germanıa men Fransıaǵa daıyn ónimderin eksporttaýǵa kóshti.

Bıylǵy jyly atalǵan aýdanda taǵy da eki balyq zaýyty salynyp, iske qosylý kútilýde.

http://ontustik.gov.kz/