Búgin Ońtústik Qazaqstan oblysynyń ákimdiginde óńir basshysy Janseıit Túımebaevtyń tóraǵalyǵymen ákimdiktiń kezekti májilisi ótti.
Kún tártibinde mal sharýashylyǵyn, mádenıet salasyn, týrızmdi damytý máseleleri men perspektıvalaryn, memlekettik jastar saıasatyn júzege asyrý jaıy men komýnaldyq menshiktiń saqtalýy jáne paıdalanýyn baqylaý syndy 5 másele qaraldy.
Jıynda joǵaryda atalǵan birinshi másele boıynsha baıandama jasaǵan oblystyq aýyl sharýashylyǵy basqarmasynyń basshysy Serik Turbekov mal sharýashylyǵy boıynsha sońǵy eki jylda iri qara mal sany 35 myńǵa artyp 865 myń basty quraǵanyn, qoı-eshki 155 myńnan 3 mln. 893 myńǵa óskenin, al jylqy 16 myńǵa artyp 230 myńǵa jetkenin aıtty.
Sonymen qatar, ol mal sharýashylyǵy ónimderin óndirýde joǵary kórsetkishterge qol jetkizilgenin atap ótti. Máselen, et óndirý 111,4%-ǵa, sút óndirý – 104,8 %-ǵa, jumyrtqa óndirý – 112,1 %-ǵa, jún óndirý 110,1 %-ǵa artqan.
Degenmen, oblysta mal sany men ónimderi artqanymen kelesi aýdandarda tómen kórsetkish baıqalýda. Atap aıtqanda, aǵymdaǵy jyldyń 10 aıynyń qorytyndysymen İQM sany Báıdibek, Ordabasy, Qazyǵurt aýdandarynda, ýaq mal Báıdibek, Ordabasy, Sozaq, Tólebı aýdandarynda, jylqy Báıdibek, Túlkibas aýdandarynda, túıe Báıdibek, Saryaǵash, Túlkibas aýdandarynda, qus sany Báıdibek, Qazyǵurt, Saıram, Túlkibas aýdandarynda kemigen.
Osy jaıttardy eskergen oblys ákimi jalpy mal sharýashylyǵyn damytý boıynsha júıeli sharalar azaıǵanyna toqtaldy.
«Osy baǵyttaǵy eń basty maqsat – azyq-túlik qaýipsizdigin qamtamasyz etý bolyp tabylady. Tabıǵaty qolaıly óńir bola tura, biz 25 jylda ishki naryqty mal sharýashylyǵy ónimderimen tolyq qamtamasyz ete almaı kelemiz. Bizde shyǵarylatyn ónimder básekege kabileti tómen, sondyqtan basqa oblystardy bylaı qoıǵanda, bizdiń tutynýshylar shet eldiń ónimderin satyp alýǵa májbúr»,-dedi J.Túımebaev.
Sonymen qatar, mal sharýashylyǵyn damytýdyń basty máselesi - bul veterınarıalyq qaýipsizdik ekenin aıtqan ákim bul másele boıynsha tıisti jumystar júrgizilmeı otyrǵandyǵyna toqtaldy.
Máselen, byltyrǵy jylmen salystyrǵanda adamdy kene shaǵý faktisi 40,4 paıyzǵa ósken. Bul zalalsyzdandyrý jumystarynyń ýaqytyly júrmeýinen bolyp otyr.
Kún tártibindegi ekinshi másele boıynsha mádenıet basqarmasynyń 2017-2020 jyldarǵa arnalǵan damý jospary boıynsha basqarma basshysy Nurbolat Ahmetjanov málimdeme jasady.
Onyń aıtýynsha, jyl basynan beri óńirdegi mádenıet jáne óner mekemelerinde 23021 ártúrli mádenı is-sharalar ótkizilgen. Al, Táýelsizdiktiń 25 jyldyǵyna arnalǵan birqatar jańa is-sharalar qolǵa alynǵan.
Sondaı-aq, ol Saryaǵash aýdanynda 5 aýyldyq mádenıet úıi men Shardara aýdandyq mýzeıiniń jańa ǵımaraty paıdalanýǵa berilgenin jetkizdi.
Jasalǵan baıandamaǵa qanaǵattanbaǵan oblys ákimi árbir is rýhanı turǵydan jasalý qajettigine toqtaldy.
- Mádenıet basqarmasy ókinishke oraı, aýdan, qalalardaǵy máselelerge tipten kóńil bólmeıdi. Qazir, kóptegen aýyldarda mádenıet oshaqtary múldem joq, al barlary qańyrap bos tur. Qarapaıym halyq úshin mádenı is-sharalar uıymdastyrylmaıdy. Turǵyndardyń komersıalyq konsertterden basqa baratyn mádenı is-sharalary joqtyń qasy, - dedi óńir basshysy.
Sonymen qatar, Mádenıet basqarmasy urpaqtar sabaqtastyǵy boıynsha tárbıelik máni bar, dástúrli mádenıet pen ádet-ǵurypty bolashaq urpaqqa jetkizý boıynsha jumystar júrgizilmeı otyrǵandyǵyn aıtqan ákim qazirgi jastarǵa tól mádenıetimizdi, dástúrimizdi jetkizý – bizdiń tarıhy jaýapkershiligimiz ekenin atap ótti.
Ońtústik Qazaqstan oblysynyń týrızmi ınfraqurylymdy damytý, marketıń, qyzmet kórsetý sapasyn arttyrý boıynsha 3 baǵytta damytylyp otyr. Bul jóninde oblystyq kásipkerlik, ındýstrıaldy-ınnovasıalyq damý jáne týrızm basqarmasynyń basshysy Marat Qarabaev baıandama jasady.
Osy baǵyttarǵa sáıkes, ol uzaq jáne qysqa merzimdi is-sharalar jospary júzege asyrylyp keletinin aıtqan ol atalǵan jumystardy jandandyrý maqsatynda birqatar usynystaryn jetkizdi.
Ońtústik Qazaqstan týrısik aımaqqa aınalýy úshin barlyq múmkindikter qarastyrylǵanyn aıtqan aımaq basshysy 5 mıllıon halqy bar Ankara qalasynyń az ýaqyt ishinde joǵary deńgeıde damyǵanyn úlgi etti. Sondaı-aq, ol atalǵan jumystar úshin olardyń memleketten qarjy almaǵanyn, ony kásipkerleri, sol jerdiń turǵyndary bıliktiń uıymdastyrýymen barlyǵy birlese otyryp sheshkenin jetkizdi.
«Bizdiń týrısik óńirge aınalýǵa tolyq múmkindikterimiz bar, biraq, ókinishke oraı biz týrıser keletin klaster jasaı almaı otyrmyz.Týrısik oryndarda qajetti qonaqúıler joq, týrıser úshin jol boıynda qajetti servıs joq. Týrıser úshin jol kórsetetin siltemeler joq, ınternet, mobıldi baılanys syn kótermeıdi, kólik ınfraqurylymy nashar. Sondaı-aq, týrısik oryndardyń sanıtarlyq jaǵdaıy tómen»,- dedi ákim.
Oblysta 3 mıllıonǵa jýyq halyqtyń 26,8 paıyzyn jastar quraıtynyn eskergen jergilikti bılik jastar máselesin kún tártibenen túsirgen emes.
Osy jyldyń 10 aıynda kámeletke tolmaǵandar arasyndaǵy qylmys 35,5 paıyzǵa, jastar arasyndaǵy jumyssyzdyq deńgeıimen nashaqorlyqtyń óskenine toqtalǵan aımaq basshysy oblystyq jastar saıasaty máseleleri jónindegi basqarma basshysy Bolat Janábilge jastardy eńbekke baýlý kerektigin aıtty.
Jıynda sonymen qatar, komýnaldyq menshiginiń saqtalýy men paıdalanýyna baqylaý boıynsha atqarylǵan jumystar jóninde oblystyq qarjy basqarmasynyń basshysy Keńesbek Mendebaev baıandady.
Májilis sońynda oblys ákimi J.Túımebaev tıisti basqarý organ basshylary men aýdan, qala ákimderine komýnaldyq múliktiń saqtalýy men tıimdi paıdalanylýyna baqylaýdy kúsheıtýdi jáne memlekettik múlikke nemquraıly qaraǵan árbir basshyǵa zań aıasynda qatań shara kórýdi tapsyrdy.
Sonymen birge mundaı májilis dúnıeniń eshbir memleketinde joq degen ákim, barlyq jasalǵan baıandamaǵa kóńili tolmaǵanyn jetkizip, baıandama jasaýdyń jańasha baǵytyna kóshýdi, ıaǵnı naqty is-shara jospary jasalyp, májilis ótkizýdiń tártibin ózgertý qajettigin mindettedi.
OQO ákiminiń baspasóz qyzmeti
