QR Mádenıet qaıratkeri, Jazýshylar odaǵynyń múshesi, kompozıtor, ánshi, akter, qalamger Ermurat Zeıiphan bıyl tiri bolsa erdiń jasy 50-ge keler edi. Marqumnyń artyna qaldyrǵan rýhanı murasyn keńirek nasıhattaý maqsatynda 2016 jyldyń 07 jeltoqsanynda keshki saǵat 18.00-de Almatydaǵy M. Áýezov atyndaǵy Qazaq memlekettik akademıalyq drama teatrynda «Eki dúnıede jalǵyzym – Qazaqstan» atty eske alý keshi ótedi. Bul keshte Ermurat Zeıiphanulynyń tańdaýly ánderin belgili óner juldyzdary oryndaıy, sondaı-aq, aqyn óleńderinen sahnalyq kompozısıa qoıylady.
Osy sharaǵa oraı 2016 jyldyń 5 jeltoqsanynda saǵat 12.00-de Qazaqstan Jazýshylar odaǵynda Ermurat Zeıiphannyń 50 jyldyq mereıtoıyna arnalǵan baǵdarlamalardy, qolǵa alynyp jatqan sharýalardy elge jetkizý maqsatynda arnaıy pres-konferensıa ótedi. Onda san qyrly talant ıesiniń ómir joly men shyǵarmashylyǵy jóninde jyly estelikter men naqty sharalar týraly habarlanady. Ári «Dúnıe ǵapyl» atty tolyq shyǵarmalar jınaǵynyń tusaýkeseri ótedi.
Ermurat Zeıiphan(1966-2011) – 1966 jyly QHR-dyń İle aımaǵy Kúnes aýdanynda dúnıege kelgen. 1985-89 jyldary İle oblystyq kórkemóner kolejinde vokal boıynsha bitirgen. 1991 jyly Atamekenge oralyp, T. Júrgenov atyndaǵy Óner akademıasynda akterlik mamandyǵynda oqıdy. Sodan keıin Abaı atyndaǵy opera jáne balet teatrynda, M. Áýezov atyndaǵy Qazaq memlekettik akademıalyq drama teatrynda akter retinde qabyldanyp, san túrli obrazdardy somdaǵan. 2000 jyldan ómiriniń sońyna deıin QR Qorǵanys mınıstrliginiń Ortalyq ansámblinde negizgi ánshi ári fólklor bóliminiń kórkemdik jetekshisi qyzmetin atqardy. Sonymen qatar, Dúnıejúzi Qazaqtary qaýymdastyǵynyń mádenı ortalyǵyn basqardy. Almaty qalalaqy Qyzdar pedagogıkalyq ınstıtýtynda sabaq berdi. «Kók týdyń jelbiregeni», «Kúnes-aı», «Dúnıeǵapyl», «Táńirim-Táńirtaýym», «Sábıler-aı», «Eki dúnıede jalǵyzym – Qazaqstan», «Kenesary», «Shyryn-aı», «Janar qyz» sekildi 70-ke jýyq ánniń avtory. Onyń «Ózińe arnadys», «Bu dúnıe», «Úshbýyryl» atty jyr jınaqtary, «Sybyzǵy saryny» atty prozalyq kitaby jaryq kórgen. 1993 jyly 14 naýryz Almaty qalasynda ótken sazgerler men ánshilerdiń respýblıkalyq «Úkili úmit» baıqaýynda bas júldeni, 1994 jyly Almaty qalasynda ótken Kúlásh Baıseıitova atyndaǵy 5-respýblıkalyq ánshiler konkýrsynyń laýreaty, 1999 jyly 13 qarashada Almatyda Áset Beıseýov atyndaǵy «Armandastar» atty respýblıkalyq baıqaýdyń laýreaty jáne 1-júldesin, 2001 jyly qarashada «Juldyz» jýrnalynyń Artyǵalı Ybyraev atyndaǵy jyr múshaırasynyń arnaıy júldesin, 2004 jyly respýblıkalyq «Edil-Jaıyq» atty avtorlyq keshke qatysyp, joǵary alǵys qurmetin, 2005 jyly 28 qyrkúıekte dúnıejúzi qazaqtarynyń 3-quryltaıyna arnalǵan halyqaralyq jyr múshaırasynyń júldegeri qatarly syılyqtardy enshilegen. Qorǵanys mınıstrligi Ortalyq ansámblindegi qajyrly eńbegi úshin maıor ataǵyn alǵan. QR Mádenıet qaıratkeri.
