«Qamshy» portaly buǵan deıin belgili dintanýshy Qaırat Joldybaıdyń «namazhanalardyń jabylýy» jaıly kótergen dabylyn jarıalaǵan edi.

Búgin, QR Din isteri jáne azamattyq qoǵam vıse-mınıstri Berik Aryn el aýmaǵyndaǵy namazhanalardyń jabylý sebebin túsindirdi. 

Vıse-mınıstrdiń aıtýynsha, úsh jyl buryn qabyldanǵan erejege sáıkes, namazxanalar memlekettik organdardan úsh júz metr shalǵaı jerde ornalasýy tıis. Alaıda bolashaqta atalǵan erejege ózgerister engizilýi ábden múmkin.

«Bul ereje 2013 jyly qabyldanǵan bolatyn. Ol kezde Din isteri agenttigi bolǵan. Sol erejege sáıkes, quqyq qorǵaý, áskerı jáne taǵy basqa memlekettik organdardyń 300 metrlik radıýsynda sondaı dinı oryndar (namazxanalar -avt.) ornalaspaýy kerek. Endi, ýaqyt ózgerip jatyr ǵoı. Mysaly, keıbir jerlerde ol ornalasqannan keıin onda basqa bir mekemeler ashylyp jatyr. Mysaly, osyǵan baılanysty Astana qalalyq din isteri basqarmasy tekseris júrgizip, sol normalardyń oryndalýyn qadaǵalap otyrady» dedi B.Aryn.

Vıse-mınıstr sondaı-aq áleýmettik jelilerde xalyqtyń namazxanalardyń jabylýyna qatysty alańdaýshylyǵynan habardar ekenin jetkizdi. Osyǵan baılanysty aldaǵy ýaqytta erejege ózgerister engizilýi ábden múmkin. «Biz osy máselege qatysty barlyq usynystardy qarap jatyrmyz. Bolashaqta erejelerge ózgerister engizilgen kezde sol usynystardyń barlyǵyn qaraımyz. Dál qazir tek sol erejege sáıkes kelmeıtin namazxanalar ǵana jabyldy. Degenmen, árbir fakti boıynsha tekseris júrgiziledi»- dep atap kórsetti vıse-mınıstr.

Eske sala ketsek, Qaırat Joldybaıuly óziniń alańdaýshylyǵynda «Namaz oqıtyn adam áıteýir bir jolyn taýyp, Alla mindettegen paryzyn oqıdy. Biraq qaı jerde? Beıbereketsizdikke óz qolymyzben ıtermelemeı, óz elimizdiń qadirin túsirmeı namazhana ashýǵa ne kedergi?! Ashýǵa emes, bar namazhanany jabýǵa ne sebep? Ekstremızmnen saqtaný ma? Namazhananyń buryshyna "bul jerde ýaǵyz aıtýǵa bolmaıdy" desek, jetkilikti emes pe? Kimmen sóılessem, barlyǵy bıliktiń bul sheshimine narazy. Musylmandardy bılikke narazy kóńilge ıtermeleıtin mundaı isterge kim jaýapty? Joq álde "Kápir bılik" deıtin takfırılerge óz qolymyzben dálel daıyndap berip jatyrmyz ba? Olaı bolsa, tákfırılermen kúresip, bosqa shabylyp qaıtemiz?!», - degen edi.