28 qarasha, Atyraýdaǵy 2 sotta sot prosesteri aıaqtalǵan Maks Boqaev pen Talǵat Aıanovqa sot úkimi oqyldy. Sýdıa Gúlnár Dáýleshova olardy «zańsyz mıtıńter uıymdastyrdy», «jalǵan aqparattar taratty», «ultarazdyq týdyrdy» dep aıyptap, 5 jylǵa sottady.
2 jeltoqsanda bas prokýratýra «Beıbit jıyndar men mıtıń uıymdastyrǵany, ultaralyq arazdyqty qozdyrǵany jáne jalǵan lańkestik úshin sottalǵandar raqymshylyqqa ilikpeıdi» dep málimdeme jasap, jurt raqymshylyqqa ilinedi dep kútken Talǵat Aıan men Maks Baqaevqa raqymshylyqtyń joq ekenin aıtyp azamattyq qoǵamnyń úmitin kesti.
Búgin, Trıbýna gazetiniń bas redaktory Janbolat Mamaı bas bolyp, qazaq jeri úshin kúresken Talǵat Aıan men Maks Boqaevqa ««Halyq batyry» qoǵamdyq syılyǵy berildi. Ony tabystaýǵa halyq Jazýshysy Qabdesh Jumádilov pen quqyq qorǵaýshy Evgenıı Jovtıs qatysty.
«Talǵat pen Makstan asqan batyr joq. Menińshe olar halyq batyry ataǵyna laıyqty. Ábden laıyqty» dep bastady Janbolat Mamaı otyrysty. Otyrysqa Atyraýdan arnaıy ushyp kelgen, Talǵat Aıannyń anasy Uldaı Aınazarova, quqyq qorǵaýshy Ásel Nurǵazıeva, sondaı-aq Maks Boqaevtiń qaryndasy Janargúl Boqaeva qatysty.
Jıynda sóz alǵan Qabdesh Jumádilov: «Batyr týa batyr bolmaıdy. Ýaqyttyń ózi seni batyr qylady. Kim batyr bolam dep oılady deısiń, qazirgi qoǵam bizdi batyr bolýǵa shaqyryp júr. Qazaqty joıyp jiberý úshin tóbesinen bomba tastaýdyń keregi joq. Tórt bes jipke tıisse bollǵany. Ol qazaqtyń jeri, tili, dini sıaqtylar. Olardy qıyp jiberseń bolǵany. Batyr jigitter Maks pen talǵat jaıdan jaı kúreske shyqpady. Olar osyǵan qarsy shyqty. Jaıdan jaı halyqtyń arasyna shyǵyp uran kótermedi. Atadan qalǵan qasıetti jer, sodan aıyrylsaq bitkenimiz. Oılaǵanyna, sony iske asyrǵanyna razymyn. Batyr degen osyndaı-aq bolady. Kerek kezinde shyqqan azamattardy biz batyr dep tanýymyz kerek», - deı kele Maks Boqaetvń qaryndasyna Boqaevqa berilgen halyq batyry syılyǵyn tabystady. Sondaı-aq, «Maks Boqaev pen Talǵat Aıanda túrmede oqıdy ǵoı» dep «Qylkópir» kitabyn syılady. «Bizge batyrlar kerek. Qorqaqtar onsyz da jetedi. Óz elin qorǵaıtyn Batyrlar kóbeıe ersin!» dep sózin aıaqtady.
Sondaı-aq, Boqaevtiń anasy telefonmen rızashylyǵyn bildirdi. «Bul ataq baǵa jetpes syılyq dep esepteımin. Jalǵyz júrip jol tapqansha kóppen birge jol tap degen. Shyryldap bir birimizge qoldaý kórsetip júrgenderińiz úshin alǵys bildiremin» dedi telefonda.
Al, Quqyq qorǵaýshy Evgenıı Jovtıs tıesili «Halyq batyry» syılyǵyn Talǵat Aıannyń anasyna tabystady.
Jıynda sóz alǵan anasy «Balam túrmede jatsa da qınalyp júrgen kezimizde qoltyǵymyzdan demegenderińiz úshin raqmet aıtamyn! Qabdesh Jumadilov pen Evgenmı Jovtıske alǵys bildiremin!» deı kele, Joǵary bılikke qarata bylaı dedi:
«Sottyń basynan aıaǵyna deıin qatystym. Árıne zańger emespin. Qarapaıym muǵalimimin. Sottyń da túr-núri bolady. Sotqa tańǵaldym. Sot bolǵan kezde adamnyń taǵdyry sheshilip jatyr-aý, aqtalyp shyǵar degen úmitpen júrdim. Biraq, aldymyzǵa Tóleshovti alyp kelmedi. Kýálardy - tepse temir úzetin jigitterdi nege alyp kelmedi? «Men aqsha almaǵanymdy dáleldep shyǵamyn» dep edi Talǵatym. Qıbraevti nege Atyraýǵa alyp kelmedi. Ókpem qara qazandaı. Jasy alpysqa kelgen men de samoletpen ushyp kelip turmyn ǵoı. Túrmede otyrǵandardyń qandaı kelisimge kelip jatqanyn biz qaıdan bilemiz. Tóleshov ózi sottalsa da balasy bosap shyqty. Bas prokýratýrada otyrǵan Asan joldas, tyńdańyzshy, sizdiń prokýratýranyń aldyna kelip analar nege ózin-ózin órteıdi? nege analardy tyńdamaısyz, men de baryp ózimdi órteıin be? Nege halyqtyń taǵdyry men adamnyń taǵdyrymen oınaısyz. Ádil adam dep estımiz. Ádil bolsańyz, aıtyńyzshy. 240 kýá bar sizdiń balańyzǵa qarsy daýys bergen dep edi. Solardyń 10-y sotqa kelip segizi moıyndamady. Al, qalǵan kýá qaıda? Olar tergeýshiniń ózderine ınstrýksıa bergenin aıtty» dep taýsyldy Talǵattyń anasy Uldaı Aınazrova.
Maks Boqaev pen Talǵat Aıandy marapattaý rásimi 17 jeltoqsanda ótýi kerek edi. Qoǵamdyq belsendi Janbolat Mamaı men Inga Imanbaı 5 jeltoqsanda "Facebook" áleýmettik jelisinde marapattaý rásimi Almaty qalasyndaǵy "Astana" qonaq úıinde, saǵat 14.00-de ótetindigin habarlaǵan. Alaıda, jeltoqsannyń 7-de "Astana" qonaq úıiniń ýákili kelisim-shartty buzyp, aqshany qaıtaryp alýdy suraǵan. Sharany uıymdastyrýshylar Almaty qalasynyń kóptegen jerlerine habarlasqanyn aıtady. Alaıda, birde-bireýi kelispegen. "Zańsyz mıtıńi uıymdastyrdy" dep aıyptalyp 5 jylǵa sottalǵan Maks Boqaev pen Talǵat Aıanǵa "Halyq batyry" ataǵyn berýdi maqsat tutqan belsendiler, marapattaý rásimin "Adam quqyqtary jónindegi búronyń" ǵımaratynda ótkizdi.
Janbolat Maımaı, búgingi marapattaý rásimimen bir ýaqytta ótip jatqan Jazýshylar Odaǵynda jeltoqsanshylardyń kitabynyń tusaýkeriniń uıymdastyrylýyn ádeıi jasalǵan áreketke balap otyr.
Búgingi jıynǵa 50 shaqty adam keldi. Onyń ishinde qoǵam belsendileri, quqyqqorǵaýshylar men qarapaıym azamattar qatysty.
