Qaraly aı –

Jeltoqsandy aınaldyryp toıyna:

Jendetter-aı,

İstep jatqan,

Ne kelgenin

Oıyna!

Eki birdeı jeltoqsanda, aqqan qanyn qazaqtyń –

Alańdar-aı

Sińire almaı jatyr áli boıyna...

Azat bolý –

Armany edi,

Jeltoqsanshy jastardyń,

Qapy qalǵan shyrmaýynda –

Qandy qaqpan astardyń...

Ólikterdiń súıeginen saty jasap órmeleý –

Taqqa otyrý,

Maqsat edi aram oıly bastardyń!

Ózgergeni –

Qoı terisin jamylǵandy qasqyrlar,

Kóz jetkeni –

Qanǵa jerik, qasqyrdan da qasqyr bar.

Aıdap salyp,

Ajalyna

Qoltyǵyna dem búrkip

Qaralaǵan jastarymdy, qara albasty basqyrlar!

Ózgergenmen –

Týdyń túsi,

Baıaǵysha qalpynda –

Azattyqty tunshyqtyrý qalyp qoıǵan saltynda:

Ult múddesi qaldy adyra,

Bılik –

Baıý jolynda

Qara shala qırandysyn qaldyrmaqshy artynda.

Qas ádilet ornamady, saltanatyn qurmady,

Sorlaǵan ult belin jazyp, tizesinen turmady.

Aıtshy maǵan,

Aıta alsań

Jeltoqsannyń qurbany

Baqytyńdy bolashaqtan kimder senen urlady?

Qaraly aı –

Jeltoqsandy,

Aınaldyrǵan toıyna:

Jendetter ǵoı,

İstep jatqan

Ne kelse de oıyna.

Eki birdeı jeltoqsannyń –

Qanyn áli keppegen

Týǵan jerdiń topyraǵy sińirmepti boıyna...

Qýanysh MUQTAI

14.12.16 jyl