Dúısenbi kúni Úndistannyń Trıvandrým (Kerala shtatynyń astanasy) qalasynda ótken Halyqaralyq kınofestıvaldyń aıasynda kınoteatrǵa kelgen 12 adam sottaldy. Olar memlekettik ánuran oınalǵanda oryndarynan turmaǵany úshin aıyptalady.

Keshirek olardy bosatqan. Alaıda, 12 adamǵa «Laýazymdy tulǵanyń buıryǵyn oryndamaı, basqa adamdarǵa yńǵaısyzdyq týdyryp, ashý-yzasyn keltirgen» degen aıyp taǵylýy múmkin.

Al jeksenbi kúni Chennaı qalasynyń kınoteatrynda ánuran oınalǵanda ornynan turmaǵan adamdardy soqqyǵa jyqqan. Keıinirek olarǵa gımndy syılamady degen aıyp taǵyldy. Olardy ekinshi kúni tutqynǵa aldy.

Ótken aıda Joǵary sot kınoteatrda kórsetiletin ár fılmniń aldynda memlekettik gımn oınaýy kerek jáne barlyǵy ony turyp tyńdaýy qajet degen qaýly shyǵardy.

Tutqyndalǵandardyń biri Indian Express gazetiniń tilshisine, turǵan jaǵdaıda, ornymyzdy joǵaltyp alamyz dep qoryqtyq dep túsindirgen.  

Sońǵy kezderi Úndistanda memlekettik gımndi syılamaǵany úshin zań turǵysynan qýdalanǵandardyń sany artyp keledi.

Qazan aıynda júre almaıtyn adamdy múgedekter arbasynan oryndyqqa otyrǵyzǵan. Gımn bastalǵanda tura almaǵany úshin kórermender oǵan aýyr sózder aıtqan eken.  

Sońǵy 3 jylda ánuran oınalǵanda turǵysy kelmegenderdi kınoteatrdan shyǵaryp jiberip otyrǵan. Tipti, bul áreketterin búlikke shaqyrýǵa baǵalaǵan.

1971 jyly qabyldaǵan zańǵa sáıkes, ánurannyń oınalýyna nemese ony oryndap turǵandarǵa  kedergi keltirgen adam 3 jylǵa bas bostandyǵynan aıyrylady nemese aıyppul salynady.

Jańa zańǵa sáıkes kınoteatrlarda ulttyq ánuran oınalǵanda ekranda Úndistannyń týy kórsetilýi kerek. Al kıno tamashalaýǵa kelgender ánuran aıaqtalǵansha  aıaǵynan tik turý qajet. Eshkim kedergi keltirmeýi úshin ánuran aıtylǵanda kınoteatrdyń esikteri jabylady. Keıinirek múmkindigi shekteýli adamdarǵa turý mindetti emes degen zańǵa ózgertýler engizilgen.

Synshylar, Joǵary sottyń sheshimin zańgerlik ýákilettilikti asyra paıdalanýmen sóz bostandyǵyn janshý degen baǵa bergen.

Álem boıynsha memlekettik ánurandy patrıotızmmen ushtastyrady.