Táýelsizdik kúni qarsańynda respýblıkalyq qoǵamdyq-saıası «Prezıdent jáne Halyq» gazeti men respýblıkalyq «Ýaqyt Tańdaýy –Vybor Vremenı» Agenttiginiń birlesken jobasy boıynsha jeńimpazdar anyqtaldy. «Jyldyń úzdik oblys ákimi» nomınasıasynda Qyzylorda oblysynyń ákimi Qyrymbek Eleýuly Kósherbaev jeńimpaz dep tanyldy. Ol jyl ishinde oblys ekonomıkasyn daǵdarysqa qarsy sharalarǵa iskerlikpen jumyldyra aldy. Turǵyn úı komýnaldyq sharýashylyq salasyn modernızasıalaý jedel júrgizildi. Indýstrıaldyq jobalardy júzege asyrý men baspana máselelerin sheshýde aıtarlyqtaı ilgerileýshilikterge qol jetkizdi.
Túrki mádenıetiniń halyqaralyq uıymy TÚRKSOI «Jyldyń úzdik halyqaralyq uıymy» atalymynda jeńiske jetti. Qazaqstannyń burynǵy Mádenıet mınıstri Dúısen Qaseıinov basqaratyn bul halyqaralyq uıym túrki halyqtarynyń ortaq mádenı muralaryn álemdik deńgeıge kóterý maqsatynda qyrýar sharýalardy júzege asyrdy.
Tehnıka ǵylymynyń doktory, profesor Ábdimútálip Ábjapparov basqaratyn Shoqan Ýálıhanov atyndaǵy Kókshetaý memlekettik ýnıversıteti «Jyldyń úzdik joǵary oqý orny» atandy. Ýnıversıtet úsh deńgeıli oqytý júıesin respýblıkada alǵashqylardyń biri bolyp júzege asyrdy.
Almaty qalalyq kardıologıa ortalyǵy halyqqa kepildi medısınalyq kómek kórsetý boıynsha «Jyldyń úzdik emdeý mekemesi» atandy. Joǵary sanatty kardıohırýrg Almat Turysbekuly Qodasbaev basshylyq etetin ujym tek 2016 jyldyń ózinde 4 myńǵa tarta koronagrafıa jáne myń jarymdaı koronarlyq arterıalardy stentteýdi júzege asyrdy. Bul osynshama adamdy ómirge qaıta oraltty degen sóz.
Sydyq Beket basqaratyn «Dáýlet-Beket» kompanıasy shubat óndirý tehnologıasyn óndiristik jolǵa qoıǵany úshin «Jyldyń úzdik kompanıasy» nomınasıasynyń jeńimpazyna aınaldy. Búgingi kúni 5 myńnan astam túıe ósirip otyrǵan sharýashylyq jylyna 1600 tonna sút, 300 tonna et, 12 tonna jún óndiretin mejege jetti. Shubat tek Qazaqstan emes kórshi memleketterge de eksportqa shyǵarylady.
«Ýaqyt Tańdaýy» jobasynda «Qazaqstannyń eńbek sińirgen qaıratkeri» Erkin Tursynǵalıuly Shúkiman «2016 jyldyń úzdik ánshisi» atandy. Arqa ánderiniń nasıhatshysy ánshilik qyzmetpen ǵana emes qazaq mýzyka óneriniń zerdeli zertteýshisi retinde de kózge túsip júr.
