Kentaýda joǵary surypty ónimderdi shyǵarý máselesi qazirgi tańda berik qolǵa alynǵan. Kendi shaharǵa qarasty Qarnaq aýylyndaǵy qojalyqtyń ónimderine oblys boıynsha suranys joǵary bolyp otyr. Osyny bilý maqsatynda óńirdiń sharýa qojalyqtarymen tanys boldyq.
Jylyjaılar, jemis baqshalary, joǵary sorttaǵy kókónister. Bul -Qarnaq aýylynyń turǵyndary óndiretin ónimder. Osy sharýamen uzaq jyldar boıy aınalysatyn aýyl turǵyndarynyń taýary búginde Respýblıka boıynsha eksportqa shyǵarylady. Osyny eskergen qala basshylyǵy kásipkerlerdi qoldaý maqsatynda 500 mln. teńgege jýyq nesıe bergen eken.
Sondaı bir eńbeginiń jemisin kórip otyrǵan «Myrza» sharýa qojalyǵynyń jumysymen tanys boldyq. Memleket tarapynan jasalyp jatqan járdemge qojalyq ıesi Anvar Myrzaev dán rıza. Túrli jemis-jıdekterdiń kóshetterin egip, olardy ózge oblystarǵa jetkizýmen aınalysatyn qojalyqtyń búginde kirisi jaqsy. Suranysy joǵary. Sharýa qojalyǵynyń basshysy Anvar Myrzaev óz jumysy jaıly bylaı dedi: «13 jyl boldy meniń baý-baqshamen aınalysyp jatqanyma. Myna eski baý ol jerden jaqsy ónim alyp jatyrmyn. Kiris jaqsy. Endi myna jerde kóshet qojalyǵym bar. Túrli almalar slıva, órik, chereshná, shabdaly, júzim barlyǵynan bar. 15 túrli alma bar. Men kóshetti búkil aýdanǵa shyǵaramyn. Shymkent oblysynan kelip alady kóshetti. Mende barlyǵy jańa. Jańa sorttar. Sýyqqa shydamdy sort». Bul qojalyq taza eńbektiń arqasynda búginderi úlken nátıjelerge jetip otyr.
Qojalyq qaramaǵynda turaqty 3 jumysshy bar. Sonymen qatar, qosymsha 20 shaqty jumysshy ýaqtyly qyzmet jasaıdy. Kólemi 6 gektardy alyp jatqan qojalyqtyń ónimderi búginde kóterme baǵamen satylýda.
Murat TALAPBERGENOV,
Qarnaq aýyly
