Ońtústik Qazaqstanda memleketten berilgen járdemdi tıimdi paıdalanǵan oblys sharýalary sońǵy 2 jylda 90 myń tonna et óndirgen. Onyń teń jartysy oblysymyzdan tys aımaqtarǵa jóneltilgen. Bıylǵy jospar budan da aýqymdy. Oblysymyzda bastalǵan qanatqaqty joba «Aýyl turǵyndaryn jumyspen qamtý» isi endigide elimizdiń basqa aımaqtarynda tájirıbege engizilmek.

Ulbolsyn Sultanova - Qarasý aýylyndaǵy mektepte dene tárbıesi páni boıynsha muǵalim. Alaıda, bul mamandyǵy mal bordaqylap, sharýashylyqpen aınalysýǵa  kedergi keltirmeıdi. Tórt túlikten tól órgizýdi uldary men  kelinderi de ıgerip alǵan. Qazir qorasynda 13 bas iri qara bordaqylanyp tur. Bul úshin Úkimetten 5 jylǵa 7 paıyzben 2,5 mıllıon teńge nesıe alǵan.

Al,  myna úıde 50 bastan astam iri qara jemge qoıylǵan. Qorada  saýyndy sıyr men jylqy  da bar. Osynsha maldy eki otbasy shashaý shyǵarmaı baǵyp otyr. Sharýashylyqtardyń jumysymen tanysyp shyqqan ózge oblystan kelgen mamandar bul tájirıbeni ózderinde de qoldanyp kórmekshi.

Búginde etti ótkizýge eshqandaı kedergi joq. Oblysymyzdyń barlyq aýdandarynda selolyq tutyný kooperatıvi ashylǵan. Olar bordaqylanǵan maldy soıyp, iri qara etiniń kelisine 980 teńgeden sanap berýde. Sondyqtan bul iske qyzyǵýshylar sany kún sanap artyp keledi. Belgilengen meje búginniń ózinde oryndalyp qoıǵan.

Kózin tapsa, bitpeıtin is joq. Osyndaı sharýashylyqpen aınalysam deýshiler mal qorasy bútin bolsa, 500 myńnan 6 mıllıon teńgege deıin nesıe alýyna múmkindik bar. 

Nurmahan KENJEHAN