Koreıanyń Inchhon áýejaıynda Qazaqstannyń 23 azamaty ustaldy. Osy eldiń kóshi-qon polısıasy qyzmetkerleriniń aıtýynsha, olar Koreıaǵa zańsyz kelgen. Qazir otandastarymyz áýejaıdyń jertólesinde oqshaý jerde otyr, dep habarlaıdy «Habar 24» telearnasy.
«Bizge myna beınejazbany ustalǵandardyń biri, Qazaqstan azamaty Shýhrat Tájimuratov jiberdi. Aıtýynsha, ol Koreıaǵa keshe túngi 00:50-de Air Astana áýe kompanıasynyń ushaǵymen kelgen. Maqsaty - saıahattaý, biraq Koreıanyń kóshi-qon polıseıleri Shýhratqa senimsizdik bildirgen», - deıdi Seýlden máseleniń mán-jaıyn baıandaǵan telearnanyń menshikti tilshisi Vladıslav Soı. «Biz Seýlge tańerteń jettik, áýejaıda bizdi qalaǵa kirgizbeı, bir reısten 18 adamdy ustap qaldy. «Sizdi qalaǵa jiberýge sebep-negiz joq» deıdi. Olardyń syltaýy - ne aqshań az, al aqshasy barlarǵa «til bilmeısiń» deıdi. Bizdi qazir jertólede ustap otyr. Barlyǵy 18 adambyz. 18 adamnyń barlyǵynyń qujattary durys bolmaýy múmkin emes», - dedi telefon arqyly saıahatshy Shýhrat Tájimuratov.
Qazaqstannyń Koreıadaǵy jalǵyz konsýly demalyssyz jumys isteýge májbúr. Óıtkeni sońǵy kezde zańsyz mıgranttar kóbeıip ketken. Onyń ústine Astana men Almatydan keletin reısterden Qazaqstannyń shamamen bes-alty azamatyna Ońtústik Koreıa aýmaǵyna ótýine ruqsat berilmeıdi. «Barlyǵy týrıspiz dep keledi. Biraq olardy Seýlde eshkim kútip almaıdy. Koreıa elin aralatatyn mekemeler bekitilmegen. Sondyqtan «kelgen maqsattaryna saı emes» degen jeleýmen elderine qaıtarylyp jatyr. Onyń ústine, olarda týrızm úshin aqshalary jetkiliksiz bolady, Koreıa óte qymbat el, 2-3 myń dollar bul jerde bir-eki kúnge ǵana jetedi», - dep atap ótti Konsýldyq máseleler jónindegi QR-dyń Koreıa Respýblıkasyndaǵy Elshiliginiń keńesshisi Ǵabıden Temirbekov.
Telefon arqyly Shýhrat Tájimuratovtyń aıtýynsha, búgin ustalǵan qazaqstandyq 18 azamattyń qataryna taǵy 5 otandasymyz qosylǵan. «Erteń ,19-y kúni saǵat 13:00-de qaıta ushyryp jiberemiz dep jatyr. Bizde jertólede eshqandaı jaǵdaı joq. Edende jatamyz. Tamaqtary aıtarlyqtaı emes», - dedi ol. Konsýl Ǵabıden Temirbekov Koreıaǵa týrızm maqsatynda saıahattap kelemin deýshiler atalmysh eldiń týrısik kompanıalaryna aldyn ala habarlasý qajettigin aıtady. «Qazir tehnologıalar jaqsy damyǵan ǵoı, ınternet arqyly, telefon arqyly habarlasyp, týrısik baýcher satyp alý kerek. Sondaı-aq ol kompanıadan Inchhon áýejaıyna osyndaı adamnyń kele jatqandyǵy, olardy kútip alyp, shyǵaryp salatyndyǵy týraly jazylǵan kepildik hat jiberýdi ótiný qajet. Sonda olardy eshqandaı kedergisiz ótkizedi», - dep atap ótti Ǵ.Temirbekov.
Qazaqstan elshiligi bergen málimet boıynsha, bıyl Ońtústik Koreıaǵa 1890 adam zańsyz kelgen. Olardyń deni týrıspiz degenimen, shyn máninde jumys istep, tabys tabýdy kózdeıtin kórinedi
