«Qazaqty búkil álemge Aısholpan tanytty. Pálen mınıstrlik, ondaǵan saıasatker jasaı almaǵandy ol jasady. VVS, SNN ol týraly fılm túsirip, Oskardan úmitti. 13 jastaǵy kishkentaı qyzdyń bir myqtylyǵy Monǵol eliniń azamaty bolsa da óziniń qazaq ekenin, týǵan jeri Altaı taýy ekenin álem jýrnalıserine jete túsindirýinde. Osy bir qarshadaı qyzdyń arqasynda Batys jurty Boratty umytyp, qazaqty jaqsy qyrynan tanı bastady. Monǵolıada ol eń abyroıly qazaqtyń biregeıi». Bul sózdi jazǵan sol Baı Ólkede týyp ósip, búginde elde eńbek etip júrgen halyqaralyq jýrnalıs Qýandyq Shamahaıuly.
16 jeltoqsan kúni Ulybrıtanıanyń kınoprokatyna Mońǵolıadaǵy 13 jasar qazaq qyzy Aısholpan jaıyndaǵy «The Eagle Huntress» derekti fılmi shyqty. Aısholpan óz áýletindegi 12 ata tarıhynda shyqqan tuńǵysh búrkitshi qyz. Fılmniń tusaýkeserine ákesi ekeýi qazaqtyń ulttyq kıimin kıip kelgen. «Oskar» alýǵa kelgende ulttyq kıimin tastamaǵan Djekı Chan syndy Aısholpan men ákesi de jarady! Qazaqtyń ulttyq qundylyǵyn, ulttyq sanasyn álemge pash etti. Fılmdi eki adam ǵana túsirgen, búdjeti óte az osy fılm qazir AQSH prokatynda 1,5 mln dollar jınaǵan.
Al, búgin, Qazaqtyń búrkitshi qyzy Mońǵolıanyń tanymal 50 adamynyń biri atandy. Quramyna saıasatkerler, sportshylar, óner sańlaqtary, halyqaralyq dárejedegi tanymal tulǵalar kirgen bul topty halyqtyń ashyq daýys berýi boıynsha iriktep alǵan.
«Saıasatker», «jańalyq ashýshylar», «jeńimpazdar», «sımvoldar» jáne 2016 jyldyń eń úzdik «janjalshylary» degen 5 top boıynsha saraptap, halyqtyń tańdaýy boıynsha anyqtalǵan 2016 jylǵy Mońǵolıanyń eń úzdik 10 «sımvoldyq» adamynyń biri bolyp tanymal búrkitshi qyz Aısholpan Nurǵaıypqyzy tańdaldy.
Taǵy bir aıta keterligi Mońǵolıanyń úzdik 50 adamynyń qatarynda Rıo olımpıadasyna Qazaqstan atynan óner kórsetip, Qazaqstan qorjynyna dzúdodan alǵashqy medaldi (qola) salǵan dzúdoshy qyz – Otgonseseg Galbadarah ta bar. Kenjegúlimiz 2016 jylǵy Mońǵolıanyń úzdik 10 «jeńimpazynyń» biri bolǵan eken.
Tipti, álemge tanylǵan ánshi Sia Aısholpan Nurǵaıyp týraly fılmge sýndtrek bolyp tabylatyn «Angel by the Wings» atty jańa ánin jazdy. Jaz jáne pop stılindegi oryndaýshy avstralıalyq Sıa Ferler rejıser Otto Belldiń «The Eagle Huntres» derekti fılmine ballada-saýnd tregin oryndady.
Táýelsiz Qazaqstandy Qazaqtyń eli retinde álemge tanytý ońaı bolǵan joq. Biri Qazaqtyń dalasyn ushy-qıyry qum tómpeshikti shól dala dep bilse, biri qazaq elin «Borat» saıqymazaq kórsetken el sıaqty ar arzan, etegi jeńil azǵyn el dep tanydy. Aısholpan ataqqa umytylǵan joq, ony ataq pen abyroı ózi izdep keldi. Ony álem tanydy. Aısholpan arqyly álem qazaqty tanydy. Qazaqtyń dástúrin tanydy. Qazaqtyń dástúri men ómir ǵurpy arqyly Qazaqstan deıtin eldiń bar ekenin tanydy.
P.S: Aısholpan Qazaqstandaǵy sońǵy 20 kúnde taratylǵan medal men ordenniń birde-birin alǵan joq. Ol ózi tanytqan eldiń, ózi tanytqan ulttyń qoshametin áli estigen de kórgen joq. Aısholpan – qazaqtyń tóbesine kóterip, maqtanysh etýge laıyq tulǵasy.
Qarabýra Qultaı
